कनकाई खबर \ नेपाल कलवार सेवा समिति झापाले हरितालिका तीज साथै मङ्गल चौथी ब्रतको अवसरमा एक भव्य कार्यक्रम सम्पन्न गरेको छ ।
समितिका झापा अध्यक्ष समाजसेवी राजकिशोर चौधरीको अध्यक्षता एवं प्रतिनिधि सभा सदस्य माननीय चन्दा चौधरीको प्रमुख आतिथ्य रहेको महान पर्व तीज विशेष कार्यक्रम आदर्श पाटी प्यालेस बिर्तामोडमा सम्पन्न भएको हो ।
कार्यक्रमलाई सम्बोधन गर्दै प्रमुख अतिथी सांसद चौधरीले महिला भनेको एउटा शक्ति भएका कारण परिवारमा एकआपसमा सहकार्य गरेर अघि बढ्नुु पर्नेमा जोड दिएकी छन् । शक्ति भएकै कारण कुनै पनि महिलाले घर भित्र साथै बाहिरको सामाजिक परिवेशमा समेत सक्रियता देखाउँनु पर्ने भन्दै प्रमुख अतिथी सांसद चौधरीले अबको समयमा एकजनाको मात्र कमाईले परिवार चलाउँन कठिन हुने बताएकी छन् ।
समाज रुपान्तरणका लागि महिलाहरु पनि सधैं सक्रियताका साथ अघि बढ्नु पर्ने तर्फ जोड दिँदै प्रमुख अतिथी चौधरीले कार्यक्रममा कलवार समुदायका महिलाहरुको अत्यन्तै राम्रो उपस्थिती भएको भन्दै खुशी व्यक्त गरिन् । रातो पहिरनमा सजिएका कलवार समुदायका महिलाहरुले तीजको गीतमा नाच्दै एकआपसमा खुशी साँटेको कार्यक्रम संयोजक हेमलता चौधरीले जानकारी दिइन् ।
संस्थाका अध्यक्ष राजकिशोर चौधरीले महिलाहरुको महान पर्व तीज विशेष कार्यक्रममा उत्साहका साथ उपस्थित भएका सबै आमा, दिदी, बहिनीहरुलाई शुभकामना व्यक्त गरे । महिलाहरुको हितका लागि संस्थाको तर्फबाट सक्दो सहयोग गर्ने प्रतिवद्धता जनाउँदै अध्यक्ष चौधरीले तीज पर्वको अवसरमा दिदीबहिनीहरु विचमा शुभकामना आदानप्रदानसहित दर खुवाउने विशेष कार्यक्रम समेत रहेको जानकारी दिए ।
संस्थाका उपाध्यक्ष मनोजकुमार चौधरीले स्वागत गरेको कार्यक्रममा कलवार समुदायका अग्रज व्यक्तित्व प्रेमचन्द्र चौधरीले कार्यक्रमको औचित्य सहित सामाजिक क्षेत्रमा संस्थाको भुमिका र वर्तमान अवस्थाको बारेमा प्रष्ट पारेका थिए । मीनाकुमारी दासले संचालन गरेको साँस्कृतिक विशेष कार्यक्रममा विशिष्ट अतिथिका रुपमा रमेश भगत, विशेष अतिथि एपोलो भगत लगायत संस्थाका सल्लाहकार समितिका पदाधिकारी तथा सदस्यहरु सहित जिल्ला बाहिरबाट समेत कलबार समुदायको बाक्लो उपस्थिती रहेको समितिका महासचिव दिपक कुमार चौधरीले जानकारी दिए ।
