कनकाई खबर \ झापाको कनकाई –४ स्थित पवित्र कनकाई नदिको किनारमा रहेको कनकाई घाटमा वातावरण मैत्री शवदाह गृह सञ्चालन सम्वन्धी सरोकारवालाहरू बीच प्रारम्भिक चरणको अन्तरक्रिया कार्यक्रम सम्पन्न भएको छ ।
कनकाई नगरपालिकाको आयोजना एवं कनकाई घाट व्यवस्थापन समिति सह—आयोजक रहेको अन्तरक्रिया कार्यक्रम कनकाई नगरपालिकाको सभाहलमा सम्पन्न भएको हो । नगर प्रमुख राजेन्द्रकुमार पोखरेलको अध्यक्षतामा सम्पन्न अन्तरक्रिया कार्यक्रममा भारतको दिल्लीस्थित पर्यावरण एवं वन सुरक्षा समिति तथा रोटरी क्लव अफ गाजियाबादका ईन्टरनेशनल सर्भिस डाइरेक्टर अन्सुल गर्ग र रोटरी क्लब अफ डिल्लीबजार काठमाडौंका उपाध्यक्ष युवराज रोक्काले सहजीकरण गरेका थिए ।
रोटरीयन अन्सुल गर्गले भारतका विभिन्न क्षेत्रमा भएका शवदाह गृहको अवस्थाका बारेमा प्रोजेक्टर मार्फत जानकारी गराएका थिए । निर्माण स्थलको अवस्थालाई हेरेर १०देखी ५०लाख सम्मको बजेटमा वातावरण मैत्री शवदाह गृह निर्माण हुन सक्ने भन्दै रोटरीयन गर्गले दाउराको खपत कम हुने र वातावरण प्रदूषणलाई पनि न्युनीकरण गर्ने भएकाले वैज्ञानीक किसिमको शवदाह गृह अत्यन्तै महत्वपूर्ण हुने जानकारी दिए ।
शवदाह गृहलाई व्यवस्थित किसिमले संचालन गर्न स्थानीय सरकार सहित क्रियाशिल सामाजिक संघसंस्थाहरु तयार हुने हो भने यसको निर्माण कार्यमा दातृ संस्थाहरुसँग सहकार्य गर्न सकिने गर्गले प्रतिवद्धता जनाए ।
रोटरी क्लवअफ डिल्ली बजार काठमाण्डौका उपाध्यक्ष युवराज रोक्काले नेपालमा भएका विद्युत शव्दाह गृह संचालनको प्रारम्भिक अवस्थाका बारेमा प्रोजेक्टर मार्फत जानकारी दिए । दाउराबाट दाहसंस्कार गर्दै गरेको हालको अवस्थामा एउटा शवकालागि ५ देखि ६ क्विन्टल सम्म दाउरा खपत भइरहेको भन्दै रोटरीयन रोक्काले यस किसिमको शवदाह गृहबाट एउटा शव जलाउँन १५० केजी मात्र दाउरा भए पुग्ने जानकारी दिए ।
दाउराबाटै शव जलाउने हिन्दु संस्कार जीवित राख्ने योजनाका साथ वातावरण मैत्री, दाउराको खपत कम हुने र एउटा शव जलाउन बढीमा डेढ देखि दुई घण्टा मात्र लाग्ने भएकाले यो प्रविधि धार्मिक मान्यता अनुसार पनि अत्यन्तै प्रभावकारी हुने भन्दै सरोकारवालाहरुले यसको कार्यान्वयनमा ढिलाई गर्न नहुने सुझाव दिए ।
कार्यक्रमलाई सम्बोधन गर्दै कनकाई नगरपालिकाका प्रमुख राजेन्द्रकुमार पोखरेलले कनकाई घाट व्यवस्थापनकालागि कोशी प्रदेश सरकारले एक करोड रुपैयाँ छुट्याएको र सवैले सहयोग गरेर वातावरण मैत्री शवदाह गृह बनाउनु पर्ने जानकारी दिए ।सम्पूर्ण सनातनी धर्मावलम्बीहरुले भगवती देवीका रुपमा पूजा गर्दै आएको पवित्र कनकाई नदीमा फोहोरमैला बगाउँने अनि शव जलाएपछि पानीमा बगाउँने परम्परा आँफैमा नमिल्दो भएको भन्दै नगर प्रमुख पोखरेलले अब यसलाई एउटा शिक्षाको रुपमा लिएर अघि बढ्नु आजको आवश्यक्ता रहेको बताए ।
कनकाई घाट व्यवस्थापन समितिका अध्यक्ष बेदप्रकाश अग्रवालले स्वागत सहित औचित्यमाथि प्रकाश पारेको कार्यक्रममा रोटरी क्लव अफ बिर्तामोडका अध्यक्ष एवं कनकाई घाटका सचिव सुरेशकुमार अग्रवाल (भद्रपुरे),कनकाई नगरपालिका कार्यपालिका सदस्य नवलकिशोर दत्त,कनकाई घाट समितिका सदस्यद्वय विजेन्द्र अग्रवाल र दुर्गाप्रसाद चापागार्इँ लगायतले वातावरण मैत्री शवदाह गृह सञ्चालन सम्बन्धी आ—आफ्नो धारणा राखेका थिए ।
कनकाई घाट व्यवस्थापन समितिका कोषाध्यक्ष गोपाल खरेलले संचालन गरेको कार्यक्रममा कनकाई नगरपालिकाको नौवटै वडाका वडाअध्यक्ष सहित जनप्रतिनिधिहरु, कार्यपालिका सदस्यहरु, कनकाई नगर क्षेत्रका सामुदायिक वनका अध्यक्ष तथा प्रतिनिधि, रोटरी क्लबअफ सुरुङ्गाका अध्यक्ष, पुर्वअध्यक्षहरु सहित कार्यसमितिका पदाधिकारीहरु, कनकाई उद्योग वाणिज्य संघ, मारवाडी सेवा समाज, कनकाई छठ सेवा समाज, नेपाल रेडक्रस सोसाइटी उपशाखा सुरुङ्गा, नेपालभारत मैत्री संघ, सुरुङ्गा जेसीज, लायन्स क्लवअफ कनकाई सुरुङ्गा र दुर्गापुर लायन्स लगायत विभिन्न सामाजिक संघसंस्थाका प्रमुख तथा प्रतिनिधिहरुको बाक्लो उपस्थिति रहेको थियो ।