कनकाई खबर \ झापाको ईलाका प्रहरी कार्यालय सुरुङ्गा यतिबेला ग्यारेजका रुपमा परिणत भएको छ ।
प्रहरी कार्यालयको गेटमा सुकेको धुपीको विरुवा
विभिन्न घटना, दुर्घटनमा चेकजाँचका क्रममा नियन्त्रणमा लिएका सवारी साधनका कारण प्रहरी कार्यालय सुरुङ्गा ग्यारेजमा परिणत हुन थालेको हो । बर्षौदेखिका थोत्रा मोटरसाइकल कार्यालय परिसरमै राखेका कारण दिनप्रतिदिन कुरुप बन्दै गएको प्रहरी कार्यालयमा फुलबारी समेत नहुनु साथै गेटमा भएका धुपीका विरुवाको समेत संरक्षण नभएकै कारण प्रहरी कार्यालयको रुपरेखा परिवर्तन भइ ग्यारेजका रुपमा परिणत हुन थालेको हो।
सुरुङ्गा प्रहरी कार्यालय परिसरको अग्र भाग थोत्रा मोटरसाईकल सहित फोहोरमैलाले भरिभराउ भएको देख्न सकिन्छ भने कार्यालयको (पूर्वतर्फ) पछाडीको भाग समेत फोहोरको डम्पीङ साइट झैं भएकाले पछिल्लो समय प्रहरी कार्यालय कुरुप बन्दै गएको स्थानीयबासी बताउँछन् ।
प्रहरी कार्यालय पछाडीको फोहोरको डम्पीङ साइट
प्रहरी कार्यालय परिसरमा प्रयाप्त ठाउँको अभाव साथै सरसफाईको समेत कमजोरी भएका कारण क्रमिक रुपले कार्यालय परिसर अस्तव्यस्त बन्दै गएको छ । यसरी फोहोरमैलाका कारण अस्तव्यस्त अवस्थामा रहेको प्रहरी कार्यालय सुरुङ्गाको ड्युटीमा रहेका एक प्रहरीले लामो समयसम्म सम्बन्धित व्यक्तिहरू सवारी साधन लिन नआउँदा यस्तो अवस्था भएको बताए । सवारीको नविकरण गर्नुपर्ने साथै लामो समयदेखिको नविकरण बापतको बुझाउनु पर्ने करको रकम धेरै लाग्ने भएकाले पनि सवारी धनीहरू आफ्नो साधन लिन नआएको हुनसक्ने प्रहरीको भनाइ छ ।
अधिकांश टुटफुट भएका र खिया लागेका मोटरसाइकलहरू छन् । थन्क्याउने ठाउँ नहुँदा सवारी साधन राखेको ठाउँमा समेत फोहोर भएको छ ।सवारी धनी आफ्नो साधन लिन नआउँदा सवारी साधन कवाडीको रुपमा परिणत हुन थालेपछि समस्या बढ्दै गएको बताइएको छ ।
प्रहरीले नियन्त्रणमा लिएका जुनसुकै सवारी साधन पनि आवश्यक प्रक्रिया पूरा गरी बैधानिक कागजात लिएर आउँने सवारी धनीहरुलाई तत्काल दिएर पठाउँने गरेको जिल्ला प्रहरी कार्यालय झापाका प्रवक्ता कृष्णकुमार चन्दले जानकारी दिए । आवश्यक कागजात नभएका र सम्पर्कमा नआएका सवारी साधनलाई कार्यालयमा राख्नु पर्ने बाध्यता प्रहरीलाई भएको प्रवक्ता चन्द बताउँछन् ।
लामो समयसम्म सवारी धनी सम्पर्कमा नआएपछि प्रहरी कार्यालयबाट राष्ट्रिय पत्रिकामा सूचना सार्वजिनक गर्ने गरेको जानकारी दिँदै झापाका प्रहरी प्रवक्ता चन्दले समयमै लिलामी हुन नपाउँदा धेरैजसो सवारी साधनहरु खिया लागेर काम नै नलाग्ने भएको बताए । प्रहरीले सूचना सार्वजनिक गरेर आफ्नो प्रक्रिया पूरा गरे पनि सवारी साधनको विभिन्न पार्टसहरु पत्रुमा बेचेर राजस्व जम्मा गर्ने गरेको बताइएको छ ।
