कनकाई खबर\ सामाजिक उत्तरदायित्व बहनमा महत्वपूर्ण भूमिका खेल्दै आएको रोटरी क्लव अफ सुरुङ्गाले मातृशिशु तथा स्वास्थ्य सेवा सम्बन्धि अत्यन्तै महत्वपूर्ण कार्यक्रम सम्पन्न गरेको छ ।
कनकाईको वडा नं. २ स्थित जेष्ठ नागरिक भवनमा सम्पन्न कार्यक्रममा स्थानीय स्तरका अति विपन्न सुत्केरी महिला तथा नवजात शिशुको स्वास्थ्य परिक्षण गरिनुका साथै पौष्टिक आहार वितरण गरिएको छ । कनकाई नगर अस्पतालको प्राविधिक सहयोग रहेको कार्यक्रममा अस्पतालकी प्रमुख डा.विद्या पोखरेल र स्टाफ नर्स निशा संग्रौलाले सुत्केरी महिला साथै नवजात शिशुको स्वास्थ्य परिक्षण सहित आवश्यक परामर्श गरेका थिए ।
क्लवका अध्यक्ष लुवराज उप्रेतीको अध्यक्षता एवं वडा नं. २ की कार्यबाहक वडाअध्यक्ष राधाकुमारी विश्वकर्माको प्रमुख आतिथ्य रहेको कार्यक्रममा रोटरी वर्ष २०२४\०२५ का एसिस्टेन्ट गभर्नर कुमारमणि पोखरेलले शिक्षा, स्वास्थ्य लगायत सामाजिक सरोकारका विषयमा रोटरीले विभिन्न संघ–संस्थासँग सहकार्य गर्दै आफ्ना कार्यक्रम अघि बढाएको जानकारी दिए । समाजमा छुट्टै पहिचान स्थापित गरेको रोटरी क्लव अफ सुरुङ्गाले स्थानीय सरकारसँगको सहकार्यमा कनकाई नगर अस्पताललाई थप व्यवस्थित बनाउँने योजना रहेको बताए ।
कार्यक्रम संयोजक एवं क्लवका सर्भिस प्रोजेक्ट चेयर रामप्रसाद निरौलाले स्वागत सहित कार्यक्रमको औचित्यमाथि प्रकाश पारेको कार्यक्रममा कनकाई नगर अस्पतालकी प्रमुख डा.विद्या पोखरेलले सामाजिक क्षेत्रमा रोटरी क्लवको भूमिका अब्बल रहेको भन्दै मातृशिशु तथा स्वास्थ्यका क्षेत्रमा रोटरीले देखाएको चासोप्रति खुलेर प्रशंसा गरिन् । समाजमा रहेका विपन्न सुत्केरी महिला तथा नवजातशिशुको स्वास्थ्यका विषयमा रोटरीले देखाएको चासोसँगै स्थानीय स्तरमा क्रियाशिल अन्य संघसंस्थाहरुले समेत अनुसरण गर्नु पर्नेमा डा.पोखरेलको जोड थियो ।
कार्यक्रममा रोटरी क्लव अफ सुरुङ्गाका पुर्व अध्यक्ष टिकाप्रसाद कट्टेल, वडासदस्य नरहरि थपलिया सहित रोटरी क्लव अफ सुरुङ्गाका पदाधिकारी तथा सदस्यहरुको उपस्थिती रहेको थियो ।क्लवका पब्लीक इमेज चेयर कमलप्रसाद कट्टेलले संचालन गरेको औपचारिक कार्यक्रममा प्रेसिडेन्ट इलेक्ट डिल्लीराम मैनालीले भोट अफ थ्याङस प्रस्तुत गरेका थिए ।