कनकाई खबर \ झापाको कनकाईमा बालबालिकाको योजना तर्जुमा प्रक्रियाका लागि वडास्तरीय बाल भेला संचालन गरिएको छ ।
आर्थिक बर्ष २०८१ \०८२ को योजना तर्जुमा प्रक्रियामा बालबालिकाहरुको अर्थपूर्ण सहभागीता गराउन र बालमैत्री स्थानीय शासन अभियानलाई कार्यान्वयन गर्न बाल भेला–२०८१ संचालन गरिएको हो । कनकाई नगरपालिकाको आयोजना तथा रुपान्तरण नेपालको प्राबिधिक सहयोग तथा समन्वयमा नगरपालिका अन्तर्गतका सम्पूर्ण वडाहरुमा वडास्तरीय बाल भेला संचालन गरिएको हो । वडास्तरीय बाल भेला सम्पन्न भए लगत्तै नगर स्तरीय बाल भेला समेत संचालन गरिने कनकाई नगरपालिकाका बालकल्याण अधिकारी उमानाथ ढकालले जानकारी दिए ।
नगरपालिकाको आयोजना भएपनि बालबालिकाको कार्यक्रम भएकाले बालबालिकाकै अध्यक्षतामा र वडा अध्यक्ष ज्युको प्रमुख आतिथ्यमा कार्यक्रम संचालन भइरहेको बालकल्याण अधिकारी ढकालले बताए । कार्यक्रममा बालबालिकाले आफ्ना मनमा लागेका बिचार भावना र योजनाहरु प्रष्ट र सक्रियताका साथ उजागर गर्ने गरेको ढकाल बताउँछन् । कनकाईको वडा न.१ बाट औपचारिक रुपमा सुरु भएको बाल भेला क्रमैसँगले सम्पूर्ण वडामा संचालन भइरहेको बताइएको छ ।
बालबालिकाको क्षेत्रमा सक्रिय र लामो अनुभव बिताइसकेका अभिषेक मिश्र र उनको समुह रुपान्तरण नेपालले प्राबिधिक सहयोग गरेको कार्यक्रममा विभिन्न समुह बनाएर बालबालिकाको मन भित्रका भावना र बिचारलाई उजागर गर्ने प्रयास गरिएको छ ।
कार्यक्रममा बालबालिकाले परिकल्पना गरेको बालमैत्री समाज हुनकालागि स्थानीय तहबाट गरिनुपर्ने कार्यक्रम, नीति तथा योजनाकालागि विभिन्न क्रियाकलापहरु भएको बताइएको छ । बालबालिकाको मुख्य आवश्यकता पहिचान गर्नु र सोही अनुसारको योजना निर्माणमा बालबालिकालाई आवश्यक सहजीकरण गर्नु कार्यक्रमको मुख्य उद्येश्य रहेको बालकल्याण अधिकारी ढकालले जानकारी दिए ।
