कनकाई खबर \ झापाको कनकाई–२,जामुनबारीस्थित सरस्वती माध्यमिक विद्यालयको व्यवस्थापन समिति अध्यक्षमा पुनः ताराप्रसाद खनाल सर्वसम्मत रुपमा चयन भएका छन् ।
विद्यालय व्यवस्थापन समितिमा स्थानीय शिक्षाप्रेमी बुद्धिजीवीबाट मनोनीत भएका खनाल अध्यक्षमा सर्वसम्मत रुपमा चयन भएका हुन् । लामो समयसम्म कनकाई मावि सुरुङ्गामा शिक्षण पेशामा आवद्ध खनाल अवकास प्राप्त शिक्षक हुन् । यस अघि पनि विद्यालय व्यवस्थापन समितिको अध्यक्षमा रहेर विद्यालयको भौतिक विकास साथै गुणस्तरीय शिक्षाकालागी महत्वपूर्ण योगदान दिएका खनालले आफ्नो अवकास प्राप्त जीवन शिक्षाको माध्यमबाट समाज रुपान्तरणमा लगाउँदै आएका छन् ।
दोस्रो कार्यकालकालागी समेत विद्यालय व्यवस्थापन समितिको अध्यक्षमा सर्वसम्मत भएका खनालको नेतृत्वमा विद्यालयले थप सफलता प्राप्त गर्ने विश्वास गरिएको छ । अतिरिक्त क्रियाकलापका विभिन्न गतिविधिहरु सहित प्रविधिमैत्री वातारणमा शिक्षण सिकाई क्रियाकलाप संचालन गर्दै आएको सरस्वती मावि यस क्षेत्रको नमुना विद्यालयका रुपमा समेत अघि बढ्दै आएको विद्यालयका सहायक प्रधानाध्यापक निर्मल खनाल बताउँछन् ।
विद्यालय व्यवस्थापन समितिको अध्यक्षमा सर्वसम्मत भएका खनालसँगै स्थानीय वडाका जनप्रतिनिधि विद्यालय व्यवस्थापन समितिको पदेन सदस्यका रुपमा रहने व्यवस्था भएअनुसार वडा नं.–२ का वडाअध्यक्ष बलराम राई समेत समितिको सदस्यमा सर्वसम्मत रुपमा चयन भएका छन् । अन्य सदस्यहरुमा क्रमशः विष्णु दाहाल, टीकाप्रसाद आचार्य, गोमा ढकाल, खुमा सिग्देल र गोमा ओली चयन भएका छन् । शिक्षक प्रतिनिधिका रुपमा सुवास शिवाकोटी साथै सदस्य सचिवमा विद्यालयका प्रधानाध्यापक नारायण अधिकारी रहने गरी नौ सदस्यीय विद्यालय व्यवस्थापन समिति सर्वसम्मत रुपमा चयन भएको जनाइएको छ ।
त्यसैगरी शिक्षक अभिभावक संघको संयोजकमा पशुपति आचार्य सर्वसम्मत रुपमा चयन भएका छन् । अन्य सदस्यहरुमा क्रमशः नारायणी देवी सुवेदी, रमिला मगर, रेविका बिक, सीता पराजुली, विष्णुमाया अधिकारी, दुर्गाप्रसाद घिमिरे, रेश्मा दर्जी, फुलमाया राई, लक्ष्मी गहतराज चयन भएको विद्यालयका प्रधानाध्यापक नारायण अधिकारीले जानकारी दिए ।
स्थानीय शिक्षासेवी देवीप्रसाद खनालको संयोजकत्वमा एक सल्लाहकार समिति समेत सर्वसम्मत रुपमा चयन भएको जनाइएको छ । समितिको सदस्यहरुमा क्रमशः तेजप्रसाद बराल, बुद्धिमान बोहरा, दलबहादुर बिक र ऋषिकेश खतिवडा चयन भएका छन् ।