आफ्नो स्वास्थ्य भन्दा पनि वडाको विकासमा धेरै चिन्ता छः वडाअध्यक्ष थापा
कनकाई खबर \ आफ्नो स्वास्थ्य भन्दा पनि वडाको विकासमा धेरै चिन्ता भएको बताउँने कनकाई– ६ का वडाअध्यक्ष दीर्घवहादुर थापा अस्वस्थ भएका छन् । गएको स्थानीय तहको निर्वाचनबाट जनप्रतिनिधिका रुपमा निर्वाचित वडाअध्यक्ष थापा शारिरीक रुपमा अस्वस्थ भइ हाल परिवारको रेखदेखमा छन् ।
विगत ७ महिनादेखी शारिरीक रुपमा अस्वस्थ भई विभिन्न अस्पतालमा भएको उपचारपछि हाल सुरुङ्गास्थित जेठा छोरा रुद्रवहादुर थापा र बुहारी सहित श्रीमतिको रेखदेखमा रहेका वडाअध्यक्ष थापालाई यतिबेला आफ्नो स्वास्थ्य भन्दा पनि वडाको विकास गतिविधिको चिन्ता छ ।
दिनप्रतिदिन कमजोर बन्दै गएको शरिर आफैंले थाम्न नसक्ने अवस्थामा पुगेको भएपनि आफ्नो वडा कार्यालय अनि वडामा रहेका सबै टोलमा हरेक दिन पुग्न पाए हुन्थ्यो भन्ने ईच्छा व्यक्त गर्छन–वडाअध्यक्ष थापा । जीवनको लामो समय शिक्षा क्षेत्रमा बिदाएका थापा जनप्रतिनिधि हुनु अघिदेखी नै आफ्नो वडामा एक सफल न्यायधिस जस्तै भूमिकामा रहेर वडाबासीलाई सहयोग अनि सेवा प्रदान गर्दै आएका थिए ।
जनताको माग अनि आँफू आवद्ध पार्टी नेकपा एमालेबाट समेत वडाअध्यक्षको जिम्मेवारी सम्हाल्न निर्देशन आएपछि दुई वर्ष अघि भएको स्थानीय तह निर्वाचनमा कनकाईको वडा नं.६ बाट वडाअध्यक्षका रुपमा निर्वाचित भएका थापाले शिक्षक पेशाबाट अवकास प्राप्त बाँकी जीवन जनताको सेवामा बिताउँने अठोट गरेका हुन् । सोही क्रममा वडाअध्यक्षका रुपमा रहेर पहिलो आर्थिक वर्षको सफल नेतृत्व प्रदान गरेका थापाले अहिले दोस्रो आर्थिक वर्ष समापनको घडीमा अस्वस्थ रहेपनि वडाको विकासमा अत्यन्तै चिन्ता व्यक्त गरिरहेको बताइएको छ ।
वडाभित्रै भएको स्रोत साधनको परिचालन गर्ने परिकल्पनाका साथ दिगो आर्थिक व्यवस्थापनमा जुटेको वडाअध्यक्ष थापाको नेतृत्व स्रोत व्यवस्थापनको खोजीमा क्रियाशिल रहेको स्थानीयबासी बताउँछन् । आँफू स्वस्थ भएर फेरी पनि जनताको सेवामा आउँन सकेमा वडाभित्रको गौरवको योजना सहित अन्य केही महत्वपूर्ण कामलाई पूर्णता दिने वडाअध्यक्ष थापाले कनकाई खबरसँगको कुराकानीमा बताए ।
वडाअध्यक्ष थापाको सपना साकार बनोस् भन्दै कनकाई खबर डटकम सहित कनकाई खबर साप्ताहिक परिवार उहाँको शिघ्र अनि पूर्ण स्वास्थ्य लाभको कामना गर्दछ ।
