भद्रपुर \ माओवादी केन्द्र परित्याग गरी हालै एमालेमा प्रवेश गर्नुभएका झापा भद्रपुरको पृथ्वीनगर निवासी शैक्षिक र सामाजिक व्यक्तित्वसमेत रहेका शिवकुमार राजभण्डारीले एक विज्ञप्ती जारी गरी आफू एमालेमा प्रवेश गर्नुको औचित्य र आवश्यकतालाई प्रष्ट गर्नुभएको छ ।
गत जेठ १० गते झापाको दमकमा आयोजित एमालेको एक कार्यक्रममा अध्यक्ष केपी शर्मा ओलीको हातबाट टिका ग्रहण गरी आफ्ना करीब २ सय साथीसहित एमालेमा प्रवेश गर्नुभएका तत्कालिन माओवादी केन्द्र भद्रपुर नगर कमिटिका अध्यक्ष रहनु भएका भण्डारीले हालै विज्ञप्ती जारी गरी आजको आवश्यकता शक्तिशाली र एकीकृत कम्युनिष्ट पार्टी नै भएको दाबी पनि गर्नुभएको छ ।
शालिन भाषामा निकालेको विज्ञप्तीमा उहाँले माओवादी केन्द्रले जनयुद्धताका र त्यसपछिका दिनमा देखाएको योजना र सपना अनुसार सत्तामा पुग्दा पनि काम गर्ने छाँट नदेखाएपछि देशकै ठूलो पार्टी एमालेमा साथी सहित प्रवेश गरेको र आफू माओवादी केन्द्रमा रहँदा पनि र अहिले एमालेमा प्रवेश गरेपछि पनि सेवा गर्नु पर्ने जनता र समाज एउटै भएकोले आफू जनता र समाजकै सेवामा लागि रहने भएकाले माओवादी केन्द्रका साथीहरुले त्यसमा कुनै रोइलो गर्नु पर्ने आवश्यकता नरहेको पनि प्रष्ट गर्नुभएको छ ।
नेता राजभण्डारीले आफू २०३६ सालतिर कक्षा ६ मा पढ्दा देखि नै आफ्ना शिक्षकहरुलाई प्रहरी प्रशासनले धरपकड गरेको देखेर त्यसको विरुद्ध लाग्दै गर्दा त्यति खेरको कम्युनिष्ट पार्टीको विद्यार्थी संगठन अनेरास्ववियुसँग नजिकिएर कम्युनिष्ट भएको स्मरण गर्दै जनयुद्धताका माओवादीमा संलग्न भएको र हाल पुरानै घरमा फर्किएको भाव व्यक्त गर्दै विज्ञप्तीको अन्त्यमा ५० प्रतिशत भन्दा बढी जनता कम्युनिष्ट भएको नेपालमा स्थीर सरकारको लागि ठोस, अनुशासित र शक्तिशाली कम्युनिष्ट पार्टी हाल एमालेका अध्यक्ष ओलीकै नेतृत्वमा सम्भव हुने ठानेर आफूहरु एमालेमा प्रवेश गरेको र अरुलाई पनि एमालेमै समाहित हुन आग्रह पनि गर्नुभएको छ ।
