कनकाई खबर \ नेकपा एमाले कनकाई नगरको नयाँ नेतृत्व चयनकालागी भएको निर्वाचनमा ६८२ मत खसेको छ ।
आज दिउँसो २ बजेदेखी साँझ ६ बजे सम्म भएको निर्वाचनमा कुल ७९२ मतदाता रहेको भएपनि ६८२ मत खसेको निर्वाचन समितिले जनाएको छ । मतदान स्थल कनकाई उद्योग वाणिज्य संघको सभा हलमा नै आवश्यक प्रक्रिया पूरा गरी अहिले ८ बजेदेखी मतगणना सुरु गर्ने गरी तयारी थालिएको निर्वाचन समिति संयोजक तारादेवी बाराकोटीले जानकारी दिएकी छन् ।
कार्यसमितिको प्रमुख पद अध्यक्ष, उपाध्यक्ष, सचिव र उपसचिव(दुई) पदकालागी निर्वाचन भएको हो । अध्यक्ष पदकालागी गोकर्ण ओझा, छविलाल थपलिया र तुलाराम बस्नेत चुनावी मैदानमा छन् । त्यस्तै उपाध्यक्ष पदकालागी इन्द्र पुलामी मगर, ऋषिकेश खतिवडा, घनश्याम पौडेल, देवीप्रसाद उप्रेती र प्रेमवहादुर कटुवालले आफ्नो उम्मेद्वारी दर्ता गराएका छन् ।
सचिव पदकालागी खिनमाया आचार्य खतिवडा, प्रकाश शिवाकोटी, मिनाल तिम्सिना, विश्वविजय खरेलले उम्मेद्वारी मनोनयन गरेका छन् । त्यस्तै उपसचिवमा पुरुषतर्फ ख्यामप्रसाद ओली, नविनकुमार राई र शुक्रराज भण्डारी रहेका छन् भने महिला तर्फ विन्दा थापा र राधिका ओली कडरिया उम्मेद्वारका रुपमा रहेको बताइएको छ ।
