कनकाई खबर \ झापाको कनकाईमा बाल बिबाह, बालश्रम , बाल हिंसा तथा लागु पदार्थ सम्बन्धि सचेतनामुलक सडक नाटक प्रदर्शनीको सुरुवात गरिएको छ ।
रुपान्तरण नेपालको आयोजना एवं कनकाई नगरपालिकाको मुख्य सहयोग तथा समन्वय र कारितास नेपाल, फक्तालुङ एजुकेसन फाउन्डेसन समेतको सहयोगमा सडक नाटक सुरुवात भएको हो । रुपान्तरण नेपालले आइतबार कनकाई नगरपालिका परिसरमा औपचारिक कार्यक्रम गर्दै सडक नाटक सुरुवात गरेको हो ।
संस्थाका अध्यक्ष अभिषेक मिश्रको अध्यक्षतामा भएको कार्यक्रममा नगर प्रमुख राजेन्द्रकुमार पोखरेलको प्रमुख आतिथ्य, उपप्रमुख आशा शिवाकोटीको बिशेष आतिथ्य एवं निमित्त प्रमुख प्रशासकिय अधिकृत जमुना कटुवाल, बाल कल्याण अधिकारी सहित नगरपालिकाका अन्य कर्मचारीहरु समेतको उपस्थितिमा कार्यक्रम संचालन गरिएको हो ।
नगरपालिकाको बालमैत्री अभियानलाई अझ तिब्र रूपमा अघि बढाउँन र समुदाय स्तरमा सचेतना फैलाउन उक्त सडक नाटक आयोजना गरिएको संस्थाका अध्यक्ष मिश्रले बताए । सडक नाटक अवलोकन गरेपछि नगर प्रमुख पोखरेलले यस नाटकले साच्चिकै समुदायमा सचेतना र ज्ञान प्रदान गर्न सक्ने बताए । सो नाटक कनकाई नगरपालिका भित्रका सम्पूर्ण वडा साथै आवश्यकता अनुसार पालिका भित्रका अन्य स्थानमा समेत देखाउने तयारी रहेको बताइएको छ ।
