कनकाई खबर \ झापामा हुने बासँग बालबालिका कार्यक्रमकालागी पुर्व प्रधानमन्त्री केपी ओली आज सुरुङ्गा आउँदैछन ।
झापा जिल्ला बाल सञ्जालले आयोजना गरेको कार्यक्रम कनकाई नगरपालिकाको मुख्य आर्थिक सहयोग सहित झापाका सम्पूर्ण पालिकाको सहयोगमा सम्पन्न हुने भएको हो ।आई.वाई. डायनामिक इन्टरनेशनल सहित स्थानीय बाल सञ्जालको समन्वय रहेको कार्यक्रममा जिल्लाका अन्य १४ पालिकाबाट प्रतिनिधिमूलक ३० बालबालिका र कनकाई नगरपालिकाबाट थप गरि जम्मा ६ सय बालबालिकाको सहभागिता रहने आयोजक जिल्ला बाल सञ्जालका अध्यक्ष अभिषेक मिश्रले जानकारी दिए ।
आज मङ्गलबार कनकाई उद्योग वाणिज्य संघ सुरुङ्गाको सभाहलमा हुने कार्यक्रममा पूर्व प्रधानमन्त्री केपी ओलीका बालबालिका सम्बन्धि दूरदृष्टि वा भिजन सुन्ने, झापाका बालबालिकाका प्रतिनिधिमूलक आवाज, अपेक्षा र आवश्यकता केपी बालाई जानकारी गराउने, केपी बा र बालबालिकाका अनुभव तथा सिकाइ आदानप्रदान हुने बताइएको छ । बालबालिकाको क्षेत्रमा नेपालकै ऐतिहासिक कार्यक्रमका रुपमा हेरिएको बासँग बालबालिका कार्यक्रममा बालबालिकाले पूर्व प्रम ओलीसँग आफ्ना समस्या र गुनासा समेत राख्न पाउने अवसर जुटेको बताइएको छ ।
विगत, वर्तमान र भविष्यका नेपालका निर्णायक व्यक्ति रहेका केपी बाका बालबालिकासँग सम्बन्धित बिचार सुन्न र पूर्वी नेपालको तेह्रथुममा जन्मेर झापामा हुर्की, बढी, पढी र जीवन सङघर्षमा अघि बढ्दै लोकप्रियताको शिखरमा पुगेका व्यक्तित्वसँग झापाली बालबालिकासँग साक्षात्कार गराउने उद्देशसहित विविध सांस्कृतिक कार्यक्रम समेत प्रस्तुत गरिने आयोजक समितिले जनाएको छ । कार्यक्रममा श्रव्यदृश्य प्रस्तुती सहित कनकाई नगरपालिकाको बालमैत्री अभियान बारे जानकारी गराउँने बताइएको छ ।
कार्यक्रमको पुर्व सन्ध्यामा आयोजक समितिले आइतबार पत्रकार भेटघाट कार्यक्रमको माध्यमबाट सम्पूर्ण तयारी पूरा भएको जनाएको छ । जिल्ला बाल सञ्जालका अध्यक्ष अभिषेक मिश्रको अध्यक्षता एवं जिल्ला समन्वय समिति झापाका प्रमुख विश्वनाथ बरालको प्रमुख आतिथ्यमा भएको पत्रका भेटघाटमा कार्यक्रम व्यवस्थापन समितिका सदस्य रवीन्द्र लम्साल, कनकाई नगरपालिकाका बाल कल्याण अधिकारी उमानाथ ढकाल लगायतले कार्यक्रमको महत्वमाथि प्रकाश पार्दै उठेका सवालको जवाफ दिएका थिए ।
कार्यक्रममा आयोजक समिति सदस्य अर्जुन उप्रेती, विजय पाठक, अनुप भट्टराई, कनकाई नगर बाल सञ्जाल अध्यक्ष अश्लेषा कडेल लगायतको उपस्थिति रहेको थियोे । पत्रकार भेटघाट कार्यक्रमको कनकाई सुरुङ्गा प्रेस क्लबका संस्थापक अध्यक्ष तीर्थराज खरेलले सहजीकरण गरेका थिए ।
