शिवसताक्षी \ नेकपा एमाले शिवसताक्षी नगरपालिकाले आगामी जेष्ठ १० र ११ गते हुने नगर अधिवेशनको सम्पूर्ण तयारी पूरा भएको जनाएको छ ।
शिवसताक्षी नगरपालिकाको दूधेमा पत्रकार सम्मेल गरी दोस्रो नगर अधिवेशनको लोगो समेत सावर्जनिक गरिएको छ । अधिवेशनका लागि शिवसताक्षी नगरका ११ वटै वडाबाट प्रतिनिधि छनौटको काम सकिएको छ । नेकपा एमाले जिल्ला कमिटी झापाले उपलब्ध गराएको बिवरण अनुसार शिवसताक्षीमा २४२२ पार्टी सदस्य रहेको बताइएको छ ।अधिवेशनमा पार्टीको नविकरण गरेका सदस्यहरुमध्ये वडाबाट नगर अधिवेशनकालागी चुनिएर आएका सदस्यले भाग लिन पाउने व्यवस्था छ । जसमा शिवसताक्षी नगरपालिका ११ वटै वडाबाट ५१३ सदस्य चुनिएर आएको नेकपा एमाले शिवसताक्षी नगर कमिटीले जनाएको छ । अन्य जनवर्गिय संगठनबाट चुनिएका प्रतिनिधिहरु सहित करिब ७०० प्रतिनिधिहरु अधिवेशनमा सहभागी हुने नेकपा एमाले शिवसताक्षी नगर कमिटीका कावा अध्यक्ष कमल नेपालले जानकारी दिए ।
अधिवेशन प्रतिनिधि छनौटमा ३३ प्रतिशत महिला,२० प्रतिशत युवाहरुको उपस्थिति अनिवार्य गराइएको छ भने आदिवासी जनजाति, पिछडा वर्ग, दलित, मजदुर, अपाङ्गता भएका सबै वर्गको प्रतिनिधित्व हुनेगरी अधिवेशन प्रतिनिधि चयन गरिएको छ । अधिवेशनमा प्रस्तुत गरिने राजनीतिक, सांगठानिक र आर्थिक प्रतिवेदन समेत तयार भइसकेको बताइएको छ । अधिवेशनका सबै प्रतिनिधिहरुलाई विभिन्न जिम्मेवारीकालागि उपसमिति गठन गरी परिचालन गरिएको अध्यक्ष नेपालले बताए । अधिवेशनको उद्घाटनमा पार्टी पोलिटव्युरो सदस्य विशाल भट्टराईको प्रमुख आतिथ्य रहने नगरकमिटी शिवसताक्षीले जनाएको छ ।
अधिवेशनको उद्घाटन सत्रमा पार्टीका ज्येष्ठ महिला कर्मठ सदस्य आइतमाया लिम्बू, पार्टीका पुराना सदस्य तारा समयाङ्या र तत्कालिन मालेको दोस्रो विस्तारित बैठक स्थलका घर मुली २०४४ सालका सेल्टर दाता देवी रेग्मीलाई सम्मान गरिने समेत पत्रकार सम्मेलनमा जानकारी गराइएको छ ।
अधिवेशनका लागि बेनुप्रसाद कार्कीको संयोजकत्वमा ७ सदस्यीय निर्वाचन मण्डल समेत गठन भएको नेकपा एमाले शिवसताक्षीले जनाएको छ ।
पत्रकार सम्मेलनमा पार्टी केन्द्रिय कमिटी सदस्य तथा शिवसताक्षी नगर इन्चार्ज मेनुका काफ्ले, प्रदेश कमिटी सदस्य, जिल्ला कमिटी सदस्यहरु लगायतको उपस्थिति रहेको थियो । अधिवेशन शिवसताक्षीको दूधे स्थित आदिवासी जनजातिको भवनमा हुने बताइएको छ । कार्यबाहक अध्यक्ष नेपालको अध्यक्षतामा सम्पन्न पत्रकार सम्मेलनको सहजीकरण नगरकमिटी उपसचिव भिम लिवाङले गरेका थिए भने पत्रकार सम्मेलन पश्चात नगरकमिटीको पूर्ण बैठक समेत बसेको बताइएको छ ।
