कनकाई खबर \ झापाको सुरुङ्गामा विशेष पुजा अर्चना सहित विविध कार्यक्रमका साथ हनुमान जयन्ती मनाइएको छ ।
कनकाई नगर क्षेत्रको विभिन्न सामाजिक गतिविधिमा सक्रिय रहँदै आएको पाथीभरा मारबाडी समाज तथा अग्रवाल समाज नगर समितिको आयोजनामा कार्यक्रम सम्पन्न भएको हो । मंंगलबार हनुमान जयन्तीको अवसर पारी नगर क्षेत्रमै यस किसिमको पहिलो विशेष कार्यक्रम संचालन गरिएको पाथीभरा मारबाडी समाजका अध्यक्ष ईश्वरचन्द्र गोयलले जनाएका छन् ।
कार्यक्रमकै अवसरमा मुस्लिम समाज सुरुङ्गाका युवाहरूबाट निशुल्क पानी वितरण गरिएको थियोे । सयौंको संख्यामा रहेका सहभागीहरुलाई लक्षित गर्दै मुस्लिम समाज सुरुङगाका युवाहरूबाट सुरुङ्गा चोकमा पानी वितरण गरिएको हो । सारा नेपाली सबै एकै हुन् , कुनै पनि धर्म जातजाती फरक हुँदैनन् भन्ने मान्यतालाई आत्मसात गर्दै मुस्लिम समुदायबाट अन्य धर्मावलम्वीहरुलाई यो तातो मौसममा पानी मात्र भए पनि वितरण गरिएको मुस्लिम समुदायका युवा ईशाक आलम( समिर) बताउँछन् ।
कनकाई उद्योग वाणिज्य संघ आसपासमा रहेको हनुमान मन्दिरमा पाठ– पारायण गर्दै बिहान् १० बजे बाट हनुमानको तस्बिर, ब्यानर , झण्डा सहित सयौंको संख्यामा रहेका सहभागीहरुले सुरुङ्गा बजारमा निशान यात्रा विशेष झाँकी, श्रीराम भजन, गीत संगीत सहित बजार परिक्रमा गर्दै पुनःमन्दिरमा नै फर्की महाप्रसाद (भण्डारा) पुजा पाठ पारायण प्रसाद तथा हनुमान चालीसा पुस्तक वितरण समेत गरिएको थियोे ।
मन्दिर परिसरमा आयोजक संस्था पाथीभरा मारबाडी समाजका अध्यक्ष ईश्वरचन्द्र गोयलको अध्यक्षतामा भएको संक्षिप्त कार्यक्रममा कनकाई वडा नं.–३ का अध्यक्ष युवराज चांैलागाईं, वडासदस्यद्वय गोविन्द सुवेदी, अनिलकुमार गोयल, ईलाका प्रहरी कार्यालय सुरुङ्गाका प्रमुख प्रवीण भट्टराई, ट्राफिक प्रहरी कार्यालय सुरुङ्गाका प्रमुख टङ्कप्रसाद दाहाल लगायतको उपस्थिति रहेको थियोे ।
मन्दिर परिसरमा अखण्ड रामायण पाठ, अष्टयाम संकीर्तन एवं निशान पुजनसहित संचालन भएको हनुमान जयन्तीमा गुरु पुरोहितहरुको विशेष टोलीले विशेष झाँकी, श्रीराम भजन लगायत कथा प्रवचन समेत गरेको थियोे । कार्यक्रमको अवसरमा सहभागीहरुलाई १ सय ५० बढी हनुमानचालीसा पुस्तक वितरण गरिएको आयोजक संस्थाका सदस्य सचिन वंशलले जानकारी दिए । सन्ध्याकालिन समयमा समेत विशेष कार्यक्रम रामायण पाठ, अष्टयाम संकीर्तन संचालन हुने बताइएको छ ।
कार्यक्रममा विभिन्न संघ संस्थाका प्रमुख तथा प्रतिनिधि, जनप्रतिनिधि, सुरक्षाकर्मी लगायत करिव २ सय बढी भक्तजनहरुको सहभागीता रहेकोे थियोे । प्रत्येक वर्ष चैत्र शुक्ल पूर्णिमाका दिन मनाइने हनुमानको पूजा आराधना गरेमा बल, बुद्धि र विद्या मिल्ने तथा दुःख र सङ्कटबाट मुक्ति पाइने जन विश्वास पनि रहेको छ ।