कनकाई खबर \ झापाको सुरुङ्गामा मिनी म्याराथन दौड प्रतियोगिता सम्पन्न भएको छ ।
“स्वास्थ्यकालागी दौड” भन्ने नाराका साथ लियो क्लव अफ कनकाई सुरुङ्गाको आयोजनामा मिनी म्याराथन दौड प्रतियोगिता सम्पन्न भएको हो । लायन्स क्लव अफ कनकाई सुरुङ्गाको भातृसंस्थाका रुपमा रहेको क्लवले पहिलो संस्करणका रुपमा प्रतियोगिता संचालन गरेको जानकारी दिँदै क्लवका अध्यक्ष रमनकुमार चौधरीले आगामी वर्षमा समेत यस किसिमको प्रतियोगितालाई निरन्तरता दिँदै अघि बढ्ने जानकारी दिए । क्लवको वार्षिक क्यालेण्डरमा राखेर मिनी म्याराथन दौड प्रतियोगितालाई आगामी वर्षमा थप व्यवस्थित गर्ने अध्यक्ष चौधरीले कनकाई खबरलाई जानकारी दिए ।
सुरुङ्गा चौकबाट सुरु भएको दौड प्रतियोगिताकालागी ७ किलो मिटरको दुरी तय गरिएको थियो । जसमा ५४ जना सहभागी भएका धावकहरु मध्ये धरानका प्रशान्त तामाङ प्रथम, दमकका सरोज सिंह दोस्रो र विर्तामोडका सुखदेव टुडु र शिव कार्कीले तेस्रो स्थान प्राप्त गरे । उनीहरुले क्रमशः प्रथम पुरस्कार नगद २० हजार, दोस्रो १० हजार र तेस्रो हुने दुवैजनाले २ हजार ५ सयका दरले नगद पुरस्कार, ट्रफी र प्रमाण पत्र प्राप्त गरेको कार्यक्रम संयोजक लियोका कोषाध्यक्ष रोशन प्रसाईँले जानकारी दिए । पुरस्कृत सबैलाई प्रमुख अतिथी कनकाई नगरपालिकाकी उपप्रमुख आशा शिवाकोटी, लायन्स क्लव अफ कनकाई सुरुङ्गाका संस्थापक अध्यक्ष एवं डिस्ट्रीक सेकेण्ड गभर्नर लीलाप्रसाद चिमरीया, कनकाई वडा नं.३ का वडाअध्यक्ष युवराज चम्लागाईँ लगायतले पुरस्कार वितरण गरेका थिए ।
क्लवका अध्यक्ष रमनकुमार चौधरीको अध्यक्षता एवं नगर उपप्रमुख शिवाकोटीको प्रमुख आतिथ्य रहेको औपचारिक कार्यक्रममा लियो डिस्ट्रीक इलेक्ट भिपी प्रवेश वास्ताकोटी, सर्भिङ सेक्रेटरी सञ्जयजंग थापा, लायन्स क्लव अफ कनकाई सुरुङ्गाका अध्यक्ष सञ्जय गजुरेल, पुर्व अध्यक्ष साजन थापा, रुपनारायण खतिवडा, ईलाका प्रहरी कार्यालय सुरुङ्गाका प्रमुख प्रविण भट्टराई लगायतको आतिथ्य रहेको थियो । क्लवका कोषाध्यक्ष रोशन प्रसाईँले स्वागत सहित औचित्यमाथि प्रकाश पारेको कार्यक्रमको संचालन सह—सचिव मीना दासले गरेकी थिइन् ।