कनकाई खबर \ झापाको सुरुङ्गामा एक कार्यक्रमका विच प्रहरी नायव उपरिक्षक (डिएसपी) सुरज कार्कीको विदाई गरिएको छ । फेरी भेटौंला कार्यक्रम मार्फत लायन्स क्लव अफ कनकाई सुरुङ्गाले डिएसपी कार्कीको सम्मान सहित विदाई गरेको हो ।
आज भन्दा १४ महिना अघि २०७९को माघ २७ गते ईलाका प्रहरी कार्यालय बिर्तामोडको जिम्मेवारी सम्हाल्न आएका कार्कीको नुवाकोट जिल्ला प्रहरी कार्यालयमा सरुवा भएका कारण चाँडै झापाको प्रहरी प्रमुख (एसपी) को जिम्मेवारी सम्हाल्ने सफलता मिलोस भन्दै क्लवका संस्थापक अध्यक्ष एवं क्याबिनेट सेक्रेटरी लीलाप्रसाद चिमरीयाले शुभकामना दिए ।
बिर्तामोडस्थित इलाका प्रहरी कार्यालयमा रहँदा डिएसपी कार्कीले अपराध अनुसन्धानमा प्राप्त गरेको सफलता, विभिन्न आन्दोलनलाई शान्तिपूर्ण बनाउन र स्थानीय संघसंस्थाहरूसँगको भूमिका रचनात्मक रहेको भन्दै सम्मान सहित बिदाई गरिएको बताइएको छ ।
लायन्सका क्याबिनेट सेक्रेटरी चिमरीयासँगै क्लवका पुर्व अध्यक्षहरु लायन रुपनारायण खतिवडा, सुरेन्द्र प्रधान, साजन थापा, मनोज बस्नेत, पत्रकार महासंघ कोशीका कार्यसमिति सदस्य लीलाराज झापाली, प्रेस चौतारी कोशी प्रदेशका कार्यसमिति सदस्य रामप्रसाद निरौला, ईलाका प्रहरी कार्यालय सुरुङ्गाका प्रहरी प्रमुख बरिष्ठ प्रहरी नायव निरिक्षक प्रविण भट्टराई, सुरुङ्गा ट्राफिक प्रहरी कार्यालय प्रमुख टंकप्रसाद दाहाल लगायतले विदाई भएर जाने प्रहरी प्रमुख कार्कीको कार्यकालमा अपराध नियन्त्रणमा महत्वपूर्ण भुमिका रहेको भन्दै प्रशंसा गरेका थिए ।
लायन्सका तर्फबाट क्याविनेट सेक्रेटरी चिमरियाले डिएसपी कार्कीलाई नेपाली टोपी, खादामाला र मायाको चिनो प्रदान गरेका थिए । क्लवका पुर्व अध्यक्ष एवं प्रेस क्लव कनकाई सुरुङ्गाका सचिव मनोज बस्नेतले कार्यक्रमको सहजीकरण गरेका थिए ।
रामेछाप घर भएका डिएसपी कार्की २०६४ देखी प्रहरी सहायक निरीक्षकबाट सेवामा प्रवेश गरेका थिए । प्रहरी सेवामा रहँदा अनुसन्धानका क्षेत्रमा धेरै काम गरेका कार्कीले नेपालको ७वटै प्रदेशमा आफ्नो कार्यकुशलता देखाइसकेको बताए । न्युन जनशक्तिको बाबजुद पनि जनतासँग सामुदायिक प्रहरी कार्यक्रम संचालन गर्दै झापामा शान्तीसुरक्षा कायम गर्न साथै अपराध, अनुसन्धानका क्षेत्रमा समेत पाएको सफलतामा स्थानीय नागरिकको समेत महत्वपूर्ण भुमिका रहेको डिएसपी कार्कीले जानकारी दिए । अपराधका क्षेत्रमा जिल्लामा सबैभन्दा धेरै मुद्धा दर्ता हुने ईलाका प्रहरी कार्यालय विर्तामोडमा आफ्नो कार्यकालमा धेरै न्युनीकरण भएको डिएसी कार्कीले दाबी गरे । आफ्नो कार्यकालमा ईलाका प्रहरी कार्यालय सुरुङ्गाको स्तर वृद्धि गर्ने काममा समेत पहल गरिएको डिएसपी कार्कीले जानकारी दिए ।
डिएसपी कार्कीलाई बिर्तामोडमा समेत ४४ वटा संघसंस्थाहरुले संयुक्त रुपमा बिदाई तथा सम्मान गरेका छन् । बिर्तामोड उद्योग वाणिज्य संघको संयोजनमा वाणिज्य संघको सभाहलमा आयोजित बिदाई समारोहमा डीएसपी कार्कीलाई सम्मानपत्रद्वारा सम्मान सहित बिदाई गरिएको वाणिज्य संघका अध्यक्ष प्रकाश शिवाकोटीले जानकारी दिए ।