कनकाई खबर \ फागुन शुक्ल पूर्णिमाका दिन मनाईने फागु पूर्णिमा अर्थात होली पर्व आइतबार हिमाली र पहाडी क्षेत्रमा धुमधामसँग मनाइएको छ ।
आफन्त, साथीभाइ मिलेर रङ, पानी खेलेर खुसी साट्ने होली पर्वको विशेषता हो। फागु पूर्णिमामा एकापसमा रङ, अबिर दलेर रमाइलो मात्र गरिँदैन, नाचगान पनि गरिन्छ ।
यसै क्रममा हरेक वर्ष होली पर्वलाई धुमधामसँगले मनाउँदै आएको कनकाई छठ सेवा समाजले यस पटक समेत साझा पर्वका रुपमा होली मिलन कार्यक्रम सम्पन्न गरेकोछ । समाजका अध्यक्ष विजयकुमार शर्माको अध्यक्षता एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको होली मिलन विशेष कार्यक्रम आफ्नै सामुदायिक भवनमा सम्पन्न गरेको हो \
होली मिलन कार्यक्रमका अवसरमा छठ समाजले एकजना जेष्ठ माता र एक जेष्ठ पुरुषलाई विशेष सम्मान गरेको छ । यसरी सम्मानित हुनेहरुमा छठ समाजका निवर्तमान अध्यक्ष राजकिशोर चौधरीकी ममतामयी माता ७५ वर्षिय सुकनीदेवी चौधरी र ६० वर्षिय मन्नु कारक रहेका छन् । सम्मानित दुवैजनालाई नगर प्रमुख राजेन्द्रकुमार पोखरेल साथै उपप्रमुख आशा विकोटी , कनकाई वडा नं.३ का वडाअध्यक्ष युवराज चम्लागाईँ लगायतले सम्मान पत्र, दोसल्ला र अविर लगाइदिएर सम्मान गरेका हुन ।
्हिन्दू धार्मिक कथनअनुसार युवावस्थाका कृष्णले एक दिन झुक्याएर राधाको मुहारमा रङ दलिदिएछन् । रङ लगाउँदा भागदौड भएछ । यो गतिविधि सबैले रमाइलो मान्न थालेर होली पर्व मनाउन थालिएको किंवदन्ती छ । अर्को जनश्रुति विष्णुका भक्त प्रह्लादसँग पनि जोडिएको छ । सत्यको विजय र असत्यको नाश भएको उत्सवका रूपमा होलीपर्व मनाइने गरिएको मानिन्छ ।
होली पर्वका अवसरमा उपत्यकासहित पहाडी र हिमाली क्षेत्रका ५६ जिल्लामा सरकारले आइतबार सार्वजनिक विदा दिएको छ ।
तराईका २१ जिल्लाहरू झापा, मोरङ, सुनसरी, सप्तरी, सिराहा, उदयपुर, धनुषा, महोत्तरी, सर्लाही, रौतहट, बारा, पर्सा, नवलपरासी (बर्दघाट सुस्तापूर्व), नवलपरासी (बर्दघाट सुस्ता पश्चिम) रुपन्देही, कपिलवस्तु, दाङ, बाँके, बर्दिया, कैलाली र कञ्चनपुरमा भने सोमबार मात्रै होली पर्व मनाइन्छ । ती जिल्लामा सोमबार बिदा दिइएको छ ।
कार्यक्रम संयोजक समाजकी कोषाध्यक्ष पुष्पा पण्डीतले सहभागीहरुलाई स्वागत गरेको कार्यक्रममा संस्थापक अध्यक्ष उपेन्द्र प्रधानले कार्यक्रमको औचित्यमाथि प्रकाश पार्दै होली पर्वको महत्वका बारेमा जानकारी दिएका थिए । विभिन्न साँस्कृतिक प्रस्तुती समेत रहेको कार्यक्रमको संचालन महासचिव रविन्द्र गुप्ताले गरेका थिए ।