कनकाई खबर \ झापाको सुरुङ्गामा जारी४० वर्ष माथिका खेलाडीको भेट्रान कपप्रतियोगिता अन्तिम चरणमा प्रवेश गरेको छ ।
प्रदेशस्तरीय नकआउट फुटबल प्रतियोगिता कनकाई भेट्रान कपको तेस्रो संस्करण अन्तिम चरणमा प्रवेश गरेको हो । प्रतियोगिता अन्तर्गत पहिलो चरणका खेल सम्पन्न भइ दोस्रो चरणमा प्रवेश गरेको हो । मुख्य आर्थिक सहयोग कनकाई नगरपालिकाको रहेको प्रतियोगितामाआयोजक सहित अन्य खेलप्रेमी व्यक्तित्वहरुबाट समेत प्राप्त सहयोगले खेल संचालन भइरहेको क्लवका आर्थिक समिति संयोजक सन्तोष लिम्बू बताउँछन् ।
कनकाई माविको खेल मैदानमा यहि चैत्र ३ गतेदेखी सुरु भइ १० गते समापन हुने प्रतियोगितामा झापा, मोरङ र सुनसरीका गरी ८ वटा टिमको सहभागिता रहेको क्लबका अध्यक्ष श्यामकुमार राईले जानकारी दिए ।हाल सम्म पहिलो चरणको प्रतियोगितामा सहभागी भएका टिमहरु मध्ये दमक, धरान, उर्लाबारी र धुलाबारी भेट्रान क्लव आउट भइसकेका छन् भने बिर्तामोड र बिराटनगर भेट्रान बिच भएको पहिलो सेमी फाइनल खेलबाट बिराटनगर आउट भएको क्लवका अध्यक्ष राईले जानकारी दिए ।बिर्तामोडले फाइनलको यात्रा तय गरिसकेको छ भने आज बिहिबार हुने दोस्रो सेमी फाइनलबाट आयोजक कनकाई र दुधे भेट्रान क्लव बिचको प्रतिस्पर्धाले अन्तिम फाइनलको टुङ्गो लाग्ने आयोजक समितिले जनाएको छ । फाइनल खेल चैत्र १० गते हुने गरी खेल तालिका सार्वजनिक गरिएको छ ।
स्वास्थ्यकालागि खेल, राष्ट्रका लागि खेल नारा सहित आयोजित नकआउट फुटबल प्रतियोगितामा प्रथम पुरस्कार १ लाख १ हजार र द्वितीय पुरस्कार ६५ हजार रुपैयाँ, प्रमाणपत्र र ट्रफी रहेको छ ।फिफाको नियमअनुसार खेलमा म्यान अफ द टुर्नामेन्टलाई नगद ५ हजार र म्यान अफ द म्याचलाई नगद २ हजार प्रदान गरिँदै आएको क्लवका सचिव रमेशप्रसाद मैनालीले जानकारी दिए। प्रतियोगिताको अवधिभर सुरुङ्गास्थित न्युरो फार्मेसीले स्वास्थ्य सामाग्री सौजन्य गरेको क्लवका सचिव मैनाली बताउँछन् ।