कनकाई खबर \ झापाको कनकाई नगरपालिकाले ११४औं अन्तर्राष्ट्रिय नारी दिवस विविध कार्यक्रमका साथ साझा अभियानका रुपमा मनाउँने भएको छ ।
यहि फागुन २५गते शुक्रबार पर्ने नारी दिवसको अवसर पारेर कनकाई नगरपालिका क्षेत्रका सवै वडामा विविध कार्यक्रम तय भएको जनाइएको छ । महिला, बालबालिका तथा ज्येष्ठ नागरिक मन्त्रालयले यस वर्ष ‘महिलामा लगानी ः सभ्य र समुन्नत समाजको थालनी’ भन्ने राष्ट्रिय नारा तय गरेको छ ।
यसै सन्दर्भमा आर्थिक र सामाजिक सशक्तिकरणकालागी लगानीको सुनिश्चितता गर्न सहयोग गर्ने रचनात्मक तथा सिर्जनात्मक कार्यक्रमहरुको आयोजना गरी देशभरी नै यस वर्षको अन्तर्राष्ट्रिय नारी दिवस मनाउँन लागिएको हो ।
नारी दिवसमा हरेक वर्ष एकै स्थानमा नगर स्तरीय कार्यक्रम संचालन गर्दै आएको कनकाई नगरपालिकाले यस पटक नगरका नौ वटै वडामा अलग —अलग कार्यक्रम आयोजना गर्ने गरी तयारी गरिएको कनकाई नगरपालिकाकी उपप्रमुख आशा शिवाकोटीले बताएकी छन् ।
नगरपालिकामा केन्द्रिकृत हुँदा सबै महिलाहरुमा नारी दिवसका बारेमा जानकारी हुन कठिन हुने भएकाले विकेन्द्रिकृत धारणा अनुरुप कार्यक्रम आयोजना गरिएको उपप्रमुख शिवाकोटी बताउँछिन् । यसै अवसरमा कनकाईको वडा नं.–९ स्थित वडा कार्यालयको आयोजनामा अन्तर्राष्ट्रिय नारी दिवस विविध कार्यक्रमका साथ सम्पन्न गरिएको छ ।
कार्यपालिका सदस्य समेत रहेकी शुसिलाबुधनी कुमारी चौधरीको अध्यक्षता एवं कनकाई नगरपालिकाकी उपप्रमुख आशा शिवाकोटीको प्रमुख आतिथ्यमा विभिन्न सांगितीक प्रस्तुती, जेष्ठमाता सम्मान सहित अन्तर्राष्ट्रिय नारी दिवस विशेष कार्यक्रम सम्पन्न भएको हो । कार्यक्रमलाई सम्बोधन गर्दै उपप्रमुख शिवाकोटीले यस वर्ष कनकाई नगर क्षेत्रमा केही भिन्न किसिमले संचालन हुने नारी दिवस विशेष कार्यक्रमले अन्य पालिकाहरुमा समेत नयाँ सन्देश दिने विश्वास व्यक्त गरिन् ।
यस अवसरमा संचालन हुने वडास्तरीय कार्यक्रमहरुमा वडाका ज्येष्ठ माता सम्मान, त्यस्तै सम्बन्धित वडामा २०८० मा अवकास प्राप्त शिक्षिका, वडाभित्रका उद्यमी महिला, उत्कृष्ट खेलाडी लगायत हरेक वडामा विशिष्टताका आधारमा महिलालाई प्रोत्साहन एवं पुरस्कृत गर्ने जस्ता कार्यक्रमहरु तय गरिएको उपप्रमुख शिवाकोटीले जानकारी दिएकी छन् ।
महिलाहरुको एउटा महत्वपूर्ण पर्वका रुपमा रहेको यो दिवसलाई थप उत्साहका साथ सफल बनाउँनु पर्नेमा उपप्रमुख शिवाकोटीको जोड थियो । हरेक मानिसले आफ्नो व्यक्तित्वमा निखारता ल्याउँनु पर्ने भन्दै उपप्रमुख शिवाकोटीले महिला भनेको घरको आमा भएकाले हरेकले आफ्नो संस्कार भुल्नु नहुने उनको जोड थियो ।
कनकाई नगरपालिकाकी महिला तथा बालबालिका शाखा प्रमुख टिका खतिवडाले औचित्यमाथि प्रकाश पारेको कार्यक्रममा तीनजना पुर्व स्वयंसेवीका र एकजना हिंसापिडित महिलालाई सम्मान गरिएको छ । यसरी सम्मानित हुनेहरुमा वडास्थित पुर्व स्वयंसेविका कुलकुमारी मिश्र, यज्ञश्वरी ढकाल, योगमाया न्यौपाने र हिंसा पिडित महिला गगनश्वरी राजवंशी रहेका छन् । सम्मानित सबैलाई उपप्रमुख शिवाकोटी, कार्यबाहक वडाअध्यक्ष नरमान श्रेष्ठ लगायतले दोसल्ला, माला साथै मायाको चिनो प्रदान गरेका थिए ।
वडा सदस्य तारा दर्नालले सहभागीहरुलाई शाव्दीक स्वागत गरेको कार्यक्रममा कार्यबाहक वडाअध्यक्ष श्रेष्ठ, नेकपा एमाले वडा नं.९ का अध्यक्ष गोविन्द उप्रेती, अग्रज महिला नेतृ नर्वदा संग्रौला, आमा समुह कनकाई वडा नं.९ की अध्यक्ष झुमा आचार्य बेडारी, बालमैत्री नगर अभियानकी अभियानकर्ता सरीता मगर, जेष्ठ माता कृष्णमाया खबास लगायतले शुभकामना मन्तव्य राखेका थिए । कार्यक्रमको संचालन नारी चेतना सक्षम संस्थाकी अध्यक्ष मुना उप्रेतीले गरेकी थिइन् ।