कनकाई खबर \ झापाको कनकाई —३सुरुङ्गास्थित संगीत साधना कला केन्द्रको २१ औं वार्षिकोत्सव सम्पन्न भएको छ ।
साधना कला केन्द्रले आफ्नो स्थापनाको२१ औं बार्षिकोत्सव आफ्ना विद्यार्थीहरुको विविध साङ्गितिक प्रस्तुतिहरुका साथ मनाएको छ । यसैक्रममा यस क्षेत्रका अग्रज संगितकर्मी कुमार पालुङ्गालाई सम्मान समेत गरिएको छ । पालुङ्गाले आफ्ना १७० भन्दा वढी गितहरुमा संगित भर्नका साथै गीत रचना र अभिनय समेत गरेका थिए ।
साधना कला केन्द्रका अध्यक्ष तुलसा पाठकको सभापतित्व एवं नेपालका बरिष्ठ गीतकार शिवशंकर थापाको प्रमुख आतिथ्य रहेको कार्यक्रममा कनकाई नगरपालिकाका प्रमुख राजेन्द्रकुमार पोखरेल, उपप्रमुख आशा शिवाकोटी, वरिष्ठ गितकार तथा नेपाल पत्रकार महासंघका संस्थापक महासचिव चन्द्र भण्डारी, लायन्स क्लवका डिष्ट्रिक सेक्रेटरी लीलाप्रसाद चिमरिया लगायतले आ—आफ्ना धारणा राख्दै गीत संगीतका माध्यमबाट समेत कनकाई नगरपालिकाको प्रचार विश्वसामु पुर्याउन यसका संस्थापक अध्यक्ष ध्रुब पाठक र संगित साधना कला केन्द्रको अहम भुमिका रहेको बताए ।
यसै विचमा संगीत साधना कला केन्द्रले स्थापना गरेको अक्षयकोषमा प्रसिद्ध युवा पं.कुबेर सुवेदीबाट रु.१ लाख प्राप्त भइसकेको छ भने कनकाई नगरपालिकाका प्रमुख राजेन्द्रकुमार पोखरेलले नगद १ लाख, संगीत साधना कला केन्द्रका संस्थापक अध्यक्ष र वर्तमान अध्यक्ष ध्रुब पाठक र तुलसा पाठकले १ लाख, कनकाई नगरपालिकाकी उपप्रमुख आशा शिवाकोटीबाट रु.५० हजार, गायक राजु अधिकारीले ५० हजार, लीला चिमरिया २५ हजार, सुशिला राईबाट रु.२५ हजार रुपैँया लगायत प्रदान गर्ने घोषणा गरेको जनाइएको छ । उक्त रकमको ब्याजबाट संगीत सर्जकलाई हरेक बर्ष सम्मान तथा पुरस्कृत गरिँदै लैजाने समेत कार्यक्रममा जानकारी गराइएको थियो ।साधना कला केन्द्रको अक्षयकोष वृद्धिकालागी सहयोगी मनहरु सम्पर्कमा आइरहेको साथै सहयोग गर्ने दाताहरुको विवरण क्रमिक रुपले स्थानीय संचार माध्यमहरुमा सार्वजनिक गर्दै जाने बताइएको छ ।
कार्यक्रममा बोल्दै संगीत साधना कला केन्द्रका संस्थापक तथा देशकै उत्कृष्ट संगीत सर्जक समेत रहेका ध्रुब पाठकले आफुले कनकाई नगरमै रहेर विगत ५० बर्षदेखि संगीत क्षेत्रको मात्रै सेवा गरिरहेको र आफुले कुनै प्राप्तिको आशा समेत नराखेको बताए । ‘म बाट संगीत सिक्ने शिक्षार्थीहरुले राम्रै प्रगति गरिरहेका बेला म भने, विगत ५० बर्षदेखि भाडाकै घरमा बसिरहेको छु तर संगीतमा साधना गर्ने काम भने हिजो पनि छाडिन, भोलीका दिनमा समेत रहिरहने छु, संगीत साधना कला केन्द्रका संस्थापक अध्यक्ष ध्रुब पाठकलले भने ।’
संगीत साधना कला केन्द्रका संस्थापक ध्रुव पाठकले स्वागत सहित औचित्यमाथि प्रकाश पारेको कार्यक्रमको संचालन साधक लेखनाथ गुरागाईँले गरेका थिए ।
