कनकाई खबर \ नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले कृषि उर्जाबाट मात्रै संवृद्धि हासिल गर्न सकिने बताएका छन् ।
झापाको शिवसताक्षी —४,बुलोचोकस्थित झापा इनर्जीको एक भव्य समारोहका विच समुद्घाटन गर्दै ओलीले समृद्धिको लागि उर्जा क्षेत्र उपयोगी भएको बताए । कोशी प्रदेशको ठुलो सौर्य परियोजना उद्घाटन गर्दै अध्यक्ष ओलीले उर्जा र कृषिबाट अधिकतम लाभ लिन सकिने भन्दै यसमा ईच्छा, तत्परता र लगनशिलता जगाउँन अनुरोध गरे । युवाहरुमा जागिरे प्रवृत्ति बढेकोमा चिन्ता व्यक्त गर्दै ओलीले भने – कृषि र उर्जामा लगानी गरेर राम्रो आम्दानी गर्न सकिन्छ । त्यसका लागि राज्यले समेत लगानीमा सहयोग गनुपर्ने धारणा राखे ।
ओलीले मंगलवार परियोजनाको उद्घाटन गरेका हुन् । परियोजनाको शिलान्यास संविधान सभाका अध्यक्ष सुवास नेम्वाङले गरेका थिए । १० मेगावाट क्षमताको ग्रीडमा जडित सौर्य विद्युत परियोजना जिल्लाको पहिलो विद्युत उत्पादन गृह हो । परीक्षणकाल सकेर अहिले मेन ग्रिडमा जडान भइसकेको छ ।
प्रतिनिधि सभाका सदस्य समेत रहेका परियोजनाका परिकल्पनाकार एवम् अध्यक्ष एलपी साँवाले अगुवाइ गरेको परियोजनामा ८५ करोड लगानी भएको छ । २१ बिगाहा १३ कठ्ठा जग्गा खरिद गरेर परियोजना निर्माण गरिएको अध्यक्ष साँवा बताउँछन् ।
परियोजनाबाट वार्षिक १ करोड ७६ लाख १० हजार युनिट विद्युत उत्पादन हुन सक्ने भन्दै अध्यक्ष साँवाले यसलाई १२ करोड ८५ लाख रुपैंयामा विक्री गर्न सकिने बताए । परियोजनाका अध्यक्ष सांसद साँवाले नेपालको उर्जा क्षेत्रमा यो प्लान्टले एउटा नयाँ आयाम थपेको दावी गरे । उर्जालाई पर्यटन प्रवद्र्धनमा जोड्दै उर्जा टुरिजमका रुपमा परियोजनाको विकास एवं विस्तार गर्न लागिएको सांसद साँवा बताउँछन् ।
विशेष समारोहका विच उद्घाटन गरिएको कार्यक्रममा सञ्चालक पवित्रा महतारा प्रसाईले स्वागत गरेकी थिइन् भने प्रवन्ध निर्देशक सुवास भट्टराईले कार्यक्रमको संचालन गरेका थिए ।
