कनकाई खबर \ झापाको शिवसताक्षी–४स्थित बोलोचोकमा रहेको देशकै ठूलो सौर्य परियोजना (झापा इनर्जी) ले आफ्नो सेवालाई विधिवत रुपमा विस्तार गर्ने भएको छ ।
झापाको पहिलो विद्युत उत्पादन गृहका रुपमा रहेको सौर्य ऊर्जा परियोजनाबाट उत्पादित उर्जा मेन ग्रिडमा जडान भइसकेको जनाइएको छ । परियोजनाको पूर्वप्रधानमन्त्री तथा नेकपा एमालेका अध्यक्ष केपी शर्मा ओलीबाट यहि माघ २३ गते विधिवत रुपमा उद्घाटन गर्ने कार्यक्रम तय भएको झापा इनर्जीका सञ्चालक सुवास भट्टराईले जानकारी दिए ।
सोलार प्यानल मार्फत उत्पादित विजुली नेपाल विद्युत प्राधिकरणको बोलोचोक सबस्टेसनमा जोडिएको छ । परियोजनाबाट उत्पादित विजुलीको नमूना परीक्षण सकिएर निरन्तर उत्पादन सुरु भइरहेको भट्टराईले बताए ।
परियोजनामा ८० करोड लगानी छ भने २७ विगाहा जमिनमा सोलार प्यानल तथा आवश्यक भौतिक संरचना निर्माण गरिएको छ । आयोजना र प्राधिकरण बीच २०७८ मंसिर १२ मै विद्युत खरिद, बिक्री प्रतियूनिट सात रुपैयाँ ३० पैसाका दरले गर्ने सम्झौता भएको थियो ।
झापा क्षेत्रनम्बर ४का प्रतिनिधिसभा सदस्य लालप्रसाद साँवासहितको सक्रियतामा सुरु भएको सौर्य ऊर्जा परियोजनाको शिलान्यास २०७८ सालमा संविधान सभाका अध्यक्ष सुवास नेम्वाङले गरेका थिए ।
कम्पनीका अध्यक्ष समेत रहेका साँवाले नेपालको उर्जा क्षेत्रमा यो प्लान्टले एउटा नयाँ आयाम थपेको दावी गरे । विधिवत रुपमा उद्घाटनको संघारमा रहेको परियोजनाका बारेमा पत्रकार सम्मेलन मार्फत जानकारी गराइएको थियो । उर्जालाई पर्यटन प्रवद्र्धनमा जोड्दै उर्जा टुरिजमका रुपमा परियोजनाको विकास एवं विस्तार गर्न लागिएको सांसद साँवा बताउँछन् ।
पत्रकार सम्मेलनमा परियोजनाका संचालक एवं विर्तामोड नगरपालिकाकी प्रमुख पवित्रा महतरा प्रसाईँ, रामचन्द्र उप्रेती, नारायण पोखरेल लगायतले कम्पनीका बारेमा आआफ्नो धारणा राखेका थिए । नेपाल बिद्युत प्राधिकरण दमकका प्रमुख परितोष चौधरीले परीक्षण प्रसारणको ३५ दिनमा ८ लाखबाट बिद्युत राष्ट्रिय प्रसारण लाइनमा जोडिएको जानकारी दिए । उनले हाल ६ मेघावट बिद्युत राष्ट्रिय प्रशारण लाइनमा थप भएपनि मौषम सफा भएको समयमा १० मेघावट सम्म उत्पादन हुने बताए ।
