राम निरौला/ कनकाई खबर
राष्ट्रिय स्वतन्त्र पार्टी झापाले जिल्लाभरि निर्माणाधिन राष्ट्रिय योजनाहरुको अनुगमन गरेको छ । ठेक्का लागेर समयमा काम नभएका तथा अलपत्र परेका योजनाहरुको अनुगमन गर्ने क्रममा झापा निर्वाचन क्षेत्र नं.४ अन्तर्गत सुरुङ्गाको कनकाई नगर अस्पताल, कनकाई वडा नं.५ र शिवसताक्षी वडा नं.७ लाई जोड्ने झोलुङ्गे पुलको अनुगमन गरिएको रास्वपा झापा क्षेत्र नं.—४ का सभापति शम्भु सुस्केराले बताए ।
कनकाई ३, सुरुङ्गास्थित निर्माणाधिन १५शै्ययाको नगर अस्पताल यहि माघ १गते निर्माण गरिसक्नु पर्ने सम्झौतामा उल्लेख छ । कार्की बन्धु कन्सट्रक्सन प्रा.लि.ले ५ करोड, ६५ लाख,१९ हजार ५३८ मा ठेक्का पारेको हो । रास्वपा पूर्वाधार विकास केन्द्रिय अनुगमन विभागकी प्रमुख तथा प्रतिनिधि सभा पूर्वाधार विकास समितिकी सदस्य निशा डाँगीको नेतृत्वमा क्षेत्रीय समिति, कनकाई र शिवसताक्षी नगर समिति साथै स्थानीयको संयुक्त टोलीले अनुगमन गरेको हो ।
संसदको पूर्वाधार विकास समितिको नियमित बैठक बसेर खबरदारी नभएका कारण आफूले योजनास्थलमै गएर अध्ययन गरेको र कमजोरी भएका ठाउँमा सरकारलाई खबरदारी गर्दै अघि बढ्ने सांसद निशा डाँगीले बताइन् । ठेकेदार तथा सरकारको मिलेमतोमा काम नहुने, पटक पटक म्याद थपिरहने र लागत मूल्य बढाइरहने प्रवृत्तिको अन्त्य गरी समयमा काम सकेर नागरिकलाई सुविधा प्रदान गर्ने उद्देश्यले निरन्तर अनुगमन गरिने सांसद डाँगी बताउँछिन् ।
क्षेत्रीय सभापति सुस्केराका अनुसार कनकाई, शिवसताक्षी, गौरादह नगरपालिका, झापा र गौरीगञ्ज गाउँपालिकामा तिनै तहका सरकारबाट अगाडि सारिएका तर समयमा काम नभएका काममा लापरबाही भएका सबै योजनाहरुको अनुगमन गरी समयमा योजना सम्पन्न गर्न तथा ठेक्का रद्द गरी नयाँ ठेक्का लगाउन सक्ने कानुनी अधिकार प्रयोग गर्न दवाव र सरकारलाई मद्धत गरिने समेत सांसद डाँगीले बताइन् ।जिल्लाका क्षेत्र नं. १, २, ३ र ४ निर्वाचन क्षेत्रका केही योजनाहरुको स्थलगत अनुगमन गरिएको र यसलाई निरन्तरता दिइने समेत रास्वपा झापाले जनाएको छ ।
