काठमाडौं । झापाको कनकाई नगरपालिका र जनता एग्रो बीच सम्झौता भएको छ ।
प्रांगारिक व्यावसायिक कृषिका माध्यमबाट उचित मूल्य र बजार प्रवर्द्धनका लागि दुई पक्ष बीच आज काठमाडौँमा सम्झौता भएको हो ।
कृषिमा आधारित बहुसंख्यक नगरवासी रहेकाले उनि हरुलाई व्यवसायिक कृषि पेशामा लाग्न प्रोत्साहन गर्ने उद्देश्यले कनकाई नगरपालिका र जनता एग्रो एन्ड फरेस्ट्री लिमिटेड बीच व्यावसायिक कृषिका माध्यमबाट उचित मूल्य र बजार प्रवर्द्धन गर्नेगरी सम्झौता भएको सम्झौता कार्यक्रममा सहभागी बनेका कनकाई नगरपालिकाका प्रमुख प्रशासकीय अधिकृत लक्ष्मीप्रसाद खरेलले जानकारी दिए ।
सम्झौता पत्रमा कनकाई नगरपालिकाका प्रमुख राजेन्द्रकुमार पोखरेल र जनता एग्रोका अध्यक्ष पवनकुमार गोल्यान ले हस्ताक्षर गरेका छन् ।सम्झौतासँगै कनकाई नगरपालिकाका किसानले व्यावसायिक कृषिलाई अघि बढाउन आवश्यक तालिम, बीउबिजन तथा प्रांगारिक मल, कीटनाशक औषधि र उत्पादन खरिद–बिक्री सम्मको व्यवस्था जनता एग्रो एन्ड फरेस्ट्रीले गर्ने भएको छ ।
हस्ताक्षर कार्यक्रममा जनता एग्रोका अध्यक्ष गोल्यानले कनकाई नगरपालिकाका किसानले उत्पादनको उचित मूल्य र बजार पाउने विश्वास व्यक्त गरे । उनले जनता एग्रोले जग्गा बाँझो राखेर युवा विदेश पलायन हुनुपर्ने अवस्थाको अन्त्य गर्न व्यावसायिक कृषि ‘खेतिदेखि विक्रेता’ सम्म गुणात्मक उत्पादन र आपूर्ति प्रणालीको विकास गरी आत्मनिर्भर अर्थतन्त्र निर्माणमा सहयोग पु¥याउने उद्देश्यले स्थानीय तहहरुसँग सम्झौता गरिरहेको बताए ।
अध्यक्ष गोल्यानले कनकाईका किसानले १ बिघा जग्गामा खेती गरेर वार्षिक ५० हजार कमाउन नसक्ने अवस्था रहेको भन्दै आफूहरुले पाँच वर्षमा ५ लाख आम्दानी गर्नसक्ने बनाउने प्रतिबद्धता जनाए । उनले नेपालमा ४ खर्बको कृषि वस्तु आयात भइरहेको तर नेपालमै कृषि उत्पादन गरी ४ खर्बबराबरको निर्यात गर्नसक्ने अवस्था रहेको बताए ।अध्यक्ष गोल्यानले आयात भइरहेको ४ खर्ब कृषि वस्तु आगामी ५ वर्षभित्रमा शून्यमा ल्याउने प्रयासमा नगरपालिको साथ सहयोग हुने विश्वास व्यक्त गरे ।
नगरपालिकासँगको सम्झौता र सहकार्यले कनकाई नगरपालिकामा हुने कृषि उत्पादनको पहिचान, उद्यमको विकास तथा कृषि प्रशोधन उद्योगको स्थापना गर्न सुधार पुग्ने उनको विश्वास छ ।नगर प्रमुख पोखरेलले जनता एग्रोसँगको सम्झौताले कनकाई नगरपालिकाभित्र कृषि उत्पादान र उद्यमका क्षेत्रमा क्रियाशील उद्यमी तथा नवउद्यमीलाई अवसरको ढोका खुलेको बताए ।
उनले जनता एग्रोसँगको सम्झौतासँगै किसानको जीविकोपार्जनको ग्यारेन्टीमा सघाउ पुग्ने र आर्थिक रुपमा समृद्धितर्फ अगाडि बढाउने विश्वास व्यक्त गरे ।जनता एग्रोले स्थानीय तहहरुसँग समन्वय र सहकार्य गर्दै प्रांगारिक कृषि उत्पादन वृद्धि गरी बजारीकरणका लागि पहल गरिरहेको जनाएको छ ।
सम्झौता कार्यक्रममा कनकाई नगर उपप्रमुख आशा शर्मा शिवाकोटी, कार्यपालिका सदस्य, वडाध्यक्ष गरि करिव १७ जनाको टोली काठमाडौं पुगेको छ ।
