कनकाई खबर \ झापाको कनकाईमा सामुदायिक कुकुर बन्ध्याकरण शिविर संचालन भएको छ ।
कनकाई नगरपालिकास्थित पशुपंक्षी तथा मत्स्य विकास शाखाले आयोजना गरेको शिविरमा बन्ध्याकरण सहित निशुल्क रेविज विरुद्धको खोप लगाउँने कार्यक्रम रहेको शाखाका प्रमुख तेजबहादुर पौडेलले जानकारी दिए ।
शनिवार सार्वजनिक विदा समेत परेकाले जनप्रतिनिधिहरु सबै व्यस्त रहेका कारण कुनै औपचारिक कार्यक्रम नगरी सोझै बन्ध्याकरण सहित निशुल्क रेविज विरुद्धको खोप लगाउँने कार्यक्रम संचालन गरिएको शाखा प्रमुख पौडेलले बताए ।
नेपाल एग्री लाईभस्टक ट्रेनिङ एन्ड रिसर्च सेन्टर इटहरी साथै नेपाल भेटेरिनरी एशोसिएसन कोशी प्रदेशको प्राविधिक सहयोग रहेको शिविरको आयोजकका रुपमा कनकाई नगरपालिकाको पशुपंक्षी तथा मत्स्य विकास शाखा रहेको बताइएको छ ।
हरेक वर्ष संचालन हुँदै आएको शिविर यस पटक तीन दिनसम्म सञ्चालन हुने जनाइएको छ । शिविरमा नगर क्षेत्रका सबै वडाबाट सामुदायिक कुकुर समातेर ल्याउने र बन्ध्याकरणसँगै रेबिज विरुद्धको भ्याक्सिन तथा आवश्यकता अनुसार अन्य औषधी उपचार गरेर छोडिने शिविरमा कार्यरत नेपाल एग्री लाईभस्टक ट्रेनिङ एन्ड रिसर्च सेन्टरका संयोजक समेत रहेका डाक्टर सुर्यनारायण शाहले जानकारी दिए । यसअघि शिवसताक्षीमा शिविर सम्पन्न गरिसकेको डाक्टरसहितको प्राविधिक टोलीले कनकाईमा दुईसय कुकुरको बन्ध्याकरण गर्ने योजना रहेको बताएको छ ।
सामुदायिक कुकुरको संख्या बढ्दै गएपछि किसानका गाईभैंसी, बाख्रा लगायतका चौपायमा रेबिजको प्रकोप बढ्ने भएकाले यसको न्युनीकरण गर्दै नगर क्षेत्रमा पशुधनको सुरक्षा गर्ने उद्येश्यले बन्ध्याकरण सहित निशुल्क रेविज विरुद्धको खोप लगाउँने कार्यक्रम संचालन गरेको डाक्टर शाहले जानकारी दिए ।
भिडियो हेर्नुहोस
