कनकाई खबर \ प्याब्सन झापाको जिल्लास्तरीय सांस्कृतिक प्रतियोगिता अन्तर्गत कनकाई —३ सुरुङ्गास्थित प्यारागन एकाडेमीले ऐतिहासिक सफलता हात पारेको छ ।
प्रतियोगितामा आधुनिक, राष्ट्रिय र लोक साँस्कृतिक नृत्य तर्फको तीनवटै विधामा प्रथम स्थान हासिल गर्दै प्यारागन एकाडेमीले जिल्लामै ऐतिहासिक सफलता हात पारेको हो । निजी तथा आवासीय विद्यालय अर्गनाइजेसन नेपाल (प्याब्सन) झापाले दमकमा गत पुस २ र ३ गते आयोजना गरेको जिल्ला स्तरीय सांस्कृतिक प्रतियोगिता अन्तर्गत नृत्यका तीन वटै विधामा प्रथम स्थान हासिल गरेको हो ।
प्यारागन एकाडेमीले आधुनिक, राष्ट्रिय र सांस्कृतिक नृत्यमा प्रथम स्थान हासिल गरेको विद्यालयले शुक्रबार (आज) पत्रकार भेटघाट गरी जानकारी दिएको हो । विद्यालय व्यवस्थापन समिति अध्यक्ष एवं संस्थापक चम्पा खनाल सुवेदीको अध्यक्षता एवं कनकाई नगर प्याब्सनका अध्यक्ष विनोद सुव्वाको प्रमुख आतिथ्यमा पत्रकार भेटघाट कार्यक्रम सम्पन्न भएको हो । एउटा नमुना विद्यालयको परिकल्पनाका साथ सुरुङ्गामा स्थापना गरिएको प्यारागन एकाडेमीले विद्यालयका संस्थापक प्रिन्सिपल स्व.लक्ष्मण सुबेदीको सपना साकार पार्ने अभियानमा सक्रिय रहेको विद्यालय व्यवस्थापन समिति अध्यक्ष चम्पा खनाल सुवेदीले जानकारी दिएकी छन् ।
२०६४ सालमा स्थापना भएको बिद्यालयमा नर्सरीदेखी कक्षा १० सम्म अध्ययन अध्यापन हुँदै आएको जनाइएको छ । बिद्यालयमा ७०३ जना विद्यार्थी र शिक्षक कर्मचारी गरेर ५७ जना रहेको विद्यालयका संस्थपक अध्यक्ष चम्पा खनाल सुवेदीले जानकारी दिइन् । आउँदो शैक्षिक सत्रदेखि कक्षा ११ सञ्चालनको तयारी गरिएको संस्थापक अध्यक्ष सुवेदीले बताएकी छन् ।
कार्यक्रमलाई सम्बोधन गर्दै नगर प्याब्सन अध्यक्ष सुव्वाले एउटै विद्यालयले तीनवटै विधामा प्रथम स्थान हासिल गरेको पहिलो रेकर्ड भएको जानकारी दिए । प्याब्सन झापाले दमकमा आयोजना गरेको प्रतियोगितामा कक्षा ५ सम्मका विद्यार्थीले आधुनिक, कक्षा ८ सम्मका विद्यार्थीले राष्ट्रिय र कक्षा ९ देखि माथिकाले लोक साँस्कृतिक विधामा नृत्य प्रतियोगिता गरेका थिए । प्रतियोगितामा तीनवटै बिधामा प्यारागन एकाडेमीले प्रथम स्थान हासिल गरेको विद्यालयका भाइस प्रिन्सिपल डिल्ली सिटौलाले पत्रकार भेटघाट कार्यक्रममा जानकारी दिए ।
प्याब्सनले आयोजना गर्ने प्रदेश र केन्द्रका प्रतियोगितामा पनि पहिलो हुने लक्ष्य लिइएको विद्यालयका नृत्य निर्देशक दिवस गिरीले बताएका छन् ।
विद्यालयका संयोजक चेतन भण्डारीले स्वागत सहित औचित्यमाथि प्रकाश पारेको कार्यक्रममा विद्यालयका संचार संयोजक एवं पूर्व शिक्षक अर्जुन उप्रेतीको समेत उपस्थिती रहेको थियो । कार्यक्रमको सञ्चालन बिद्यालयको सञ्चार समिति सदस्य एवं पुर्व शिक्षक रामप्रसाद निरौलाले गरेका थिए ।
