कनकाई खबर \ सुरुङ्गा कनकाई बचत तथा ऋण सहकारी संस्थाको १२ औं वार्षिक साधारण सभा सम्पन्न भएको छ ।
तराईकै पहिलो सामुदायिक वनका रुपमा रहेको कनकाई सामुदायिक वन समुहका उपभोक्तालाई सदस्यता प्रदान गर्दै आजभन्दा १२ वर्ष अघि २०६८ को असोजबाट बचत तथा ऋणको कारोबार गर्न सुरुवात गरेको यस सहकारी संस्थामा हाल १ हजार ४ सय दश जना शेयर सदस्य रहेका छन् । वन समुहको क्षेत्र कनकाईको वडा नं.२, ३ र ४ सिमाना कायम गरिएको संस्थाको शेयर पूँजी रु.१ करोड, ७५ हजार ७ सय रहेको बताइएको छ ।
संस्थाका अध्यक्ष प्रेमप्रसाद चुडालको सभापतित्व एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको साधारण सभामा संस्थाको तर्फबाट वार्षिक प्रतिवेदन प्रस्तुत गर्दै अध्यक्ष चुडालले सदस्यहरुकालागी सहकारीको माध्यमबाट गरिबि न्यूनिकरण साथै उद्यमशीलता श्रृजना गर्दै रोजगारीको दिगो व्यवस्थापनमा संस्था अघि बढेको बताए । संस्थाले आफ्ना शेयर सदस्यहरुलाई आत्मनिर्भर बनाउँनकालागी स्वरोजगारमुखी कार्यक्रममा प्रोत्साहन गर्दै आएको अध्यक्ष चुडालले प्रस्तुत गरेको प्रतिवेदनमा उल्लेख छ ।
साधारण सभाको अवसरमा संस्थाको वार्षिक कार्यक्रमका रुपमा रहेको ज्येष्ठ सदस्यहरु, उत्कृष्ट विद्यार्थी, उत्कृष्ट ऋणी साथै उत्कृष्ट बचतकर्ताहरुलाई विशेष सम्मान गरिएको छ । सम्मानित सबैलाई कार्यक्रमका प्रमुख अतिथी कनकाई नगरपालिकाका प्रमुख पोखरेलले सम्मान पत्र सहित दोसल्ला ओढाएर सम्मान गरेका हुन् ।
कार्यक्रमलाई सम्बोधन गर्दै नगर प्रमुख पोखरेलले सामुदायिक वनको माध्यमबाट उपभोक्ताको जीवनस्तर उकास्ने उद्येश्यका साथ अघि बढेको यो सहकारी आफैंमा अब्बल संस्था रहेको बताए । संस्थाका उपाध्यक्ष कमल मैनालीले स्वागत गरेको कार्यक्रममा कनकाई वडा नं.२ का वडाअध्यक्ष प्रताप राई, संस्थाका संरक्षकका रुपमा रहेका कनकाई सामुदायिक वनका अध्यक्ष ख्याम ओली, संस्थापक अध्यक्ष लक्ष्मीप्रसाद पाठक, नवजागरण सहकारी संस्थाका लेखा संयोजक उपेन्द्र अधिकारी, भगवती साकोसका उपाध्यक्ष पुण्यप्रसाद सिटौला, दोमुखा साकोसका सचिव छबि थपलिया, भीमसेन साकोसका सचिव तेजबहादुर प्रधान लगायतले शुभकामना मन्तव्य राखेको कार्यक्रमको संचालन सचिव श्यामकुमार पौडेलले गरेका थिए ।
