कनकाई खबर \ झापाका सञ्चारकर्मी तथा बिर्तामोड झापा डटकम अनलाइनका सञ्चालक टिकाराम बाँस्तोलालाई समाचारको बिषयलाई लिएर बारम्बार ज्यान मार्नेसम्मको धम्की दिएको घटनाप्रति पत्रकारजन्य संघ संगठनहरुले अलग अलग प्रेस विज्ञप्ती जारी गर्दै गम्भिर ध्यानाकर्षण भएको जनाएका छन् ।
नेपाल पत्रकार महासंघ झापा, प्रेस चौतारी नेपाल र प्रेस सेन्टर नेपाल झापाले अलग–अलग विज्ञप्ती जारी गर्दै झापाका सञ्चारकर्मी बाँस्तोलालाई समाचारको विषयलाई लिएर बारम्बार ज्यान मार्नेसम्मको धम्की दिएको घटनाप्रति ध्यानाकर्षण भएको जनाएका हुन् ।
पीडितका अनुसार ‘अफ्रिका पठाइदिने भन्दै लाखौँ ठगी गर्ने बिर्तामोडका गिरी पक्राउ’ शीर्षकमा प्रकाशित समाचारको बिषयलाई लिएर पक्राउ परेका अन्जेश गिरीका बुवा बिर्तामोड–४ निवासी गणेश गिरी र परिवारका अन्य सदस्यले अलग–अलग नम्बरबाट सञ्चारकर्मी बाँस्तोलालाई पटक–पटक फोन गरेर अस्लील गालीगलौजसहित ज्यान मार्ने धम्कीसम्म दिएका छन् ।
प्रकाशित समाचारप्रति चित्त नबुझे या गुनासो भए त्यस उपर कानुनी उपचारमा जान सकिने विकल्प भएको र त्यसलाई लत्याएर सञ्चारकर्मीलाई धम्क्याएको यो घटना अत्यन्त निन्दनीय भएको साथै प्रेस स्वतन्त्रता र कानुन विपरीतको कार्य भएको बिज्ञप्तीमा उल्लेख छ ।
स्वतन्त्र पत्रकारितामाथिको यस ज्यादतीमा संलग्नलाई तत्काल पक्राउ गरी कानुनी दायरामा ल्याउन तथा पीडित सञ्चारकर्मीको सुरक्षामा विशेष ध्यान दिन सम्बन्धित निकायको ध्यानाकर्षण गराउँदै महासंघ झापाका सचिव डिकेश लामा, प्रेस चौतारी नेपाल झापाका सचिव प्रकाश पौडेल साथै प्रेस सेन्टर झापाका सचिव पुष्प खड्काद्वारा हस्ताक्षर गरिएको प्रेस विज्ञप्तीमा जनाइएको छ ।