कनकाई खबर \ झापाको शिवसताक्षी नगरपालिकामा प्रथम शिवसताक्षी आधारभूत विद्यालय नगर स्तरीय फुटबल प्रतियोगिता हुने भएको छ ।
शिवसताक्षी नगरपालिका वडा नं. ४ बोलोचोक बजार पश्चिमकोे खेल मैदानमा २०८० मंसिर २८ गतेदेखि ३० गतेसम्म प्रतियोगिता सञ्चालन हुने शिवसताक्षी नगरपालिकाले जनाएको छ । शिवसताक्षी नगरपालिकाभित्रका सामुदायिक तथा संस्थागत विद्यालयका कक्षा ८ सम्मका विद्यार्थीहरु बीच प्रतिष्पर्धा गराउने र सानैदेखि खेलप्रति जागरुक गराउने उद्देश्यले प्रतियोगिताको आयोजना गरिएको वडा नं. ५ का वडाध्यक्ष सिकिन पासवानले जानकारी दिए । प्रतियोगिताको उद्घाटन शिवसताक्षी नगरपालिकाका नगर प्रमुख मेगाहाङ्ग थोप्राले उद्घाटन गर्ने छन् ।
प्रतियोगिताको विजेता टिमले नगद १५ हजार, उप विजेता टिमले नगद १० हजार सहित ट्रफि, मेडल र प्रमाण पत्र प्राप्त गर्ने आयोजक शिवसताक्षी नगरपालिका वडा नं. ५ को कार्यालयले जनाएको छ । खेलको मेन अफदी म्याच, मेन अफदी सिरिज लगायत सबै विधाका खेलाडीलाई पुरस्कृत गरिने बताइएको छ ।
मंसिर ३० गते हुने फाइनल खेल अघि शिवसताक्षी वडा नं. ४ र ५ बीच मैत्रीपूर्ण भेट्रान खेल हुने र उक्त खेलको विजेता टिमलाई प्रोत्साहन स्वरुप नगद ५ हजार प्रदान गरिने समेत वडाध्यक्ष पासवानले जानकारी दिए । पासवनका अनुसार हालसम्म २० ओटा टिम सम्पर्कमा आएका छन् । टिमको संख्या हेरेर दिनमा कति वडा प्रतियोगिता गराउन सकिन्छ भन्ने थाहा हुनेछ ।
प्रतियोगिताका लागि शिवसताक्षी नगरपालिकाले र वडा नं. ५ को कार्यालयको खेल सञ्चालनका लागि आर्थिक सहयोग रहने बताइएको छ ।
प्रतियोगिता सम्पन्न गर्नका लागि ३ लाख ८५ हजार खर्चको अनुमानित गरिएको वडा नं. ५ को कार्यालयले जनाएको छ । प्रतियोगिता शिवसताक्षी नगरपालिका वडा नं. ५ को कार्यालयले आयोजना गरेको हो ।
