बिर्तामोड । झापा जिल्ला कारागार भद्रपुरमा कैदीवन्दीहरुको संख्या क्षमताभन्दा धेरै माथि पुगेको छ । साढे ७ सय क्षमताको कारागारमा १५ सय ८८ जना पुगेको जेलर मोहनलाल पनेरुले जानकारी दिए । कैदीवन्दी र थुनुवा संख्या उल्लेख्य मात्रामा वृद्धि भएको पनेरुको भनाई छ ।
आजको तथ्याङक अनुसार पुरुष १४ सय ९७ र १ बालक सहित ९१ जना महिला कारागारमा रहेको जानकारी दिए । त्यसमध्ये ४० प्रतिशत लागुऔषध मुद्धामा सजाय भोगिरहेका छन् । सबैभन्दा धेरै लागुऔषध, दोस्रोमा कर्तव्य ज्यान र तेस्रोमा जवरजस्ती करणी मुद्धामा कैदीबन्दी सजाय भुक्तान गरिरहेको बताइएको छ ।
क्षमताभन्दा दोब्बर कैदीवन्दी हुँदा व्यवस्थापन समेत कठिनाई भइरहेको छ । भएकै संरचनामा टालटुल, टिन छाप्रो हालेर काम चलाइरहेको जेलर पनेरुको भनाई छ । उनका अनुसार अहिलेसम्म सुत्न कै लागि समस्या छैन, अब अझै बढेमा कठिनाई हुन सक्छ ।
झापा कारागारको संरचना धेरै पुरानो भइसकेकाले जोखिम उत्तिकै बढेको छ । यस सम्बन्धमा कारागार विभागले पटक–पटक निरीक्षण गरे पनि व्यवस्थापनका लागि कुनै काम अघि बढाएको छैन । कारागारको नाममा केन्द्रमोडमा १० विगा जमिन पनि छ । तर, अहिलेसम्म डीपीआर, नक्साको समेत काम नभएको पनेरु बताउँछन् ।ijlas
