चितवन — दुईजना मान्छे मारेपछि चितवन निकुञ्जको टोलीले नियन्त्रणमा लिएको बाघको तीन रात साँघुरो खोरमा अटेसमटेस भएर बिते । निकुञ्जको प्राविधिक टोलीले सोमबार राति पौने नौ बजे तिर मकवानपुर मनहरी गाउँपालिका ६ मा पर्ने चितवन निकुञ्जको मध्यवर्ती क्षेत्र अन्तर्गतको जोगीताल इलाकाबाट मान्छे खाएको बाघलाई नियन्त्रणमा लिएको थियो ।
त्यो बाघ नियन्त्रणमा लिएका बेला राखेको साँधुरो खोरमै बिहीबार साँझसम्म बस्यो । नियन्त्रणमा लिएका बाघ राख्न बनाएका फराकिला खोरहरू अहिले प्रायः भरिएका छन् ।
‘तीन दिनसम्म प्रयास गरेर बल्लतल्ल व्यवस्थापन गर्न सकेका छौं,’ चितवन राष्ट्रिय निकुञ्जको सूचना अधिकारी रहेका संरक्षण अधिकृत गणेशप्रसाद तिवारीले भने । सोमबार समाएपछि सो बाघलाई सानो खोरबाट नझिकी निकुञ्जको मुख्यालय कसरामा नै राखिएको थियो । बिहीबार साँझ सो बाघलाई सौराहा लगेर ठूलो खोरमा राखेको तिवारीले बताए । सौराहामा दुईवटा बाघ अटाउने खोर पनि खाली थिएन । कसरामा चारवटा बाघ अटाउने खोर त थिए तर ति पनि पुरै भरिएका थिए ।
‘सौराहामा रहेको अलि बलियो बाघलाई बर्दिया खोरमा राख्न पठाएर कमजोर अवस्थामा नियन्त्रणमा लिएको यो बाघलाई सौराहाको खोरमा राखिएको हो,’ तिवारीले भने । बर्दियामा पनि बाघले खोर भरिएका छन् । तर जनतन व्यवस्थापन गरेर एउटा बाघ अटाउने बनाएको तिवारीले बताए । नियन्त्रणमा लिएका बाघ राख्न चितवनसहित बर्दिया, पर्सा र बाँके निकुञ्जमा खोरहरु रहेका छन् । तर सबै तिरका खोर भरिभराउ रहेका छन् । मान्छे खान पल्केको बाघलाई नियन्त्रणमा नलिए थप दुर्घटना गराउने जोखिम हुन्छ ।
सोमबार साँझ नियन्त्रणमा लिएको बाघले जोगिताल इलाकामा घाँस काट्न गएका चितवन राप्ती नगरपालिका १ पिप्ले दुबिचौरका ४३ वर्षीय हरि पौडेललाई आक्रमण गरेर ज्यान लिएको थियो । सो घटनापछि बाघलाई नियन्त्रणमा लिन गएको टोलीले सोही ठाउँमा बाघले आक्रमण गरेर मारेको अर्को शव पनि फेला पारेको थियो ।
मान्छेलाई आक्रमण गर्ने बाघहरु नियन्त्रणमा लिनु पर्ने बाध्यता नै हुन्छ । तर त्यस्ता बाघ कहाँ राख्ने भन्ने समस्या पनि उत्पन्न भएको छ । बाघ बढेसँगै मान्छेमाथि आक्रमण गर्ने घटना पनि बढेका छन् ।कान्तिपुरबाट
