कनकाई खबर \ ‘अस्तित्वहरुको न्यायिक सम्बोधन’ भन्ने मूल विचार र मान्यता बोकेर विगत एघार बर्षदेखि अस्तित्वहरुको न्यायिक सम्बोधन र मानव चेतना अभिवृद्धिको लागि कार्यरत स्वीकारोक्ति फाउण्डेशनले ‘ विश्व शान्ति यात्रा २०२३’ को शुरुवात गरेको छ ।
बिर्तामोडमा पत्रकार सम्मेलन गरेर फाउण्डेशनले झापाको बेलडाँगी शिविरमा आज सोमबार एक कार्यक्रम आयोजना गरी विश्व शान्ति यात्रा शुरु गरेको जनाएको छ ।
नेपाल तथा भारतका विभिन्न स्थानमा कार्यक्रम गरी मंसिर २९ गते काठमाण्डौमा यात्रा समापन हुने पत्रकार सम्मेलनमा जानकारी गराइएको हो ।
यात्राको क्रममा फाउण्डेशनले झापा, सुनसरी, मोरङ र इलामका विभिन्न स्थान साथै भारतको गुवाहटी, गान्तोक र सिलिगुढीमा कार्यक्रम गर्ने जनाएको छ । भारतमा हुने एक कार्यक्रमका बिच नेपाली साहित्यकार लिलबहादुर क्षेत्रीलाई छ लाख नेपाली रुपैँयाको ‘स्वीकारोक्ति सिद्धि पुरस्कार’ प्रदान गर्ने कार्यक्रम रहेको फाउण्डेसनका अध्यक्ष डेन्जोम साम्पाङ राईले जानकारी दिए ।
त्यस्तै मंसिर १४ गते झापाको बिर्तामोडमा एक वृहत साहित्यिक तथा सम्मान कार्यक्रम आयोजना गर्न लागिएको अध्यक्ष राईले बताए । अन्य स्थानहरुमा वृक्षारोपण, छलफल, बहस तथा विद्यार्थीहरुसँग अन्तरक्रिया आदि गरिने अन्तर्राष्ट्रिय समन्वय तथा कार्यक्रम आयोजना प्रमुख कर्ण गुरुङले जानकारी दिए ।
मंसिर २८ र २९ गते काठमाण्डौमा निजी तथा आवासीय विद्यालय अर्गनाइजेसन काठमाण्डौसँगको सहकार्यमा साहित्यिक तथा युवा शैक्षिक शिखर सम्मेलन गरेसँगै यात्रा समापन हुने कार्यक्रम सञ्चालक सुनिता तामाङले जानकारी दिइन् ।
पर्यावरण संरक्षण, विश्व शान्ति तथा सम्मृद्धिलाई मुल मर्मको रुपमा आत्मसाथ गर्दै फाउण्डेसनले विभिन्न कार्यक्रमहरु गर्दै आइरहेको ग्लोबल टावर २०२३ का इभेन्ट कोडिनेटर अर्जुन उप्रेतीले जानकारी दिए ।
