राम निरौला,
कनकाई खबर \ झापाको कनकाईमा विपन्न समुदायलाई लक्षीत गरेर संकलन गरिएको न्यानो कपडा ‘कपडा बैंक’ मार्फत वितरण गर्न थालिएको छ ।
जाडोको समयमा निम्न स्तरका मजदुर साथै विपन्न समुदायकालागि न्यानो कपडाको आवश्यक्तालाई मध्यनजर गर्दै कपडा बैंक संचालन गरिएको हो । स्थानीय स्तरमा क्रियाशिल युवाहरुको सामाजिक संस्था ज्ञानज्योती युवा क्लवको सक्रियतामा न्यानो कपडा संकलन गरेर कपडा बैंक मार्फत वितरण गरिएको क्लवका अध्यक्ष नारायण भेट्वालले वताएका छन् । कनकाई नगरपालिका ३ सुरुङ्गा चौकस्थित सार्वजनिक स्थलमा जाडोको समयभरी रहने गरी कपडा बैंक संचालनमा ल्याइएको हो । प्रदेश सभा सदस्य हिराकुमार थापाले एक समारोहका विच कपडा बैंकको उद्घाटन गर्दै विपन्न बर्गका स्थानीयवासीलाई न्यानो कपडा वितरण गरेका हुन् । कार्यक्रमका प्रमुख अतिथी समेत रहेका थापा, कनकाई नगरपालिकाका प्रमुख राजेन्द्रकुमार पोखरेल, उपप्रमुख मन्जु प्रसाई लगायतले संयुक्त रुपमा न्यानो कपडा वितरण गरेका छन् ।
पुसको सिरेटोसँगै चिसोले जनजिवन प्रभावित भएको यो समयमा जाडोको न्यानो कपडा पाउँदा ईश्वरकै बरदान सावित भएको विपन्न परिवारकी स्थानीय ईन्द्रकुमारी बारकोटीले बताएकी छन् । दैनिक उपभोग्य सामाग्रीकालागि सरकारले भत्ता दिँदै आएको भएपनि जाडोको समयमा हुने लुगाकपडाको जोहो गर्न नसकेकाले समस्या झेल्दै आएको बारकोटीले बताएकी छन् । भत्ता खाँदै गरेको भएपनि आफ्नो उमेर बताउँन नसक्ने कनकाई ४ स्थित बगरमा बस्दै आएकी बारकोटीले आफ्नो आवश्यक्ता बल्ल पूरा भएको भन्दै खुशी व्यक्त गरेकी छन् ।
त्यस्तै शारिरीक रुपमा समेत अस्वस्थ भएकी स्थानीय तालामाई सोरेन जाडोको न्यानो कपडा पाउँदा दङ्ग परेकी छन् । साना छोराछोरी, श्रीमान र आफू गरी चारजनाको परिवारमा दैनिक श्रीमानले मात्र मजदुर गरेर कमाएको पैशा विहान बेलुकाको छाक टार्न धौ धौ हुने गरेकाले जाडोको कपडा किन्ने अहिलेसम्म आफ्नो हैसियत नपुगेको सोरेन बताउँछिन् । यस्तो जाडोको बेला घरमा पनि धेरै समय आगो तापेर बिताउँने गरेको बताउँदै सोरेनले परिवारका चारैजनालाई हुनेगरी निशुल्क रुपमा न्यानो कपडा पाउँदा आँफूमा खुशी छाएको बताएकी छन् ।
क्लवका अध्यक्ष नारायण भेट्वालको सभापतित्व रहेको न्यानो कपडा वितरण कार्यक्रममा सम्पूर्ण सहयोगी हातहरुलाई अभियानमा सहकार्य गर्दै कपडा बैंकमा सहयोग गरिदिन क्लवका अध्यक्ष भेट्वालले अनुरोध गरेका छन् । क्लवका सचिव पारस खरेलको स्वागत तथा सल्लाहकार सदस्य सागर ढुङ्गानाको संचालन रहेको उद्घाटन कार्यक्रममा कनकाई नगर प्रमुख राजेन्द्रकुमार पोखरेल, समाजसेवी श्याम ओली लगायतले मन्तव्य राखेका थिए ।
