कनकाई खबर \ झापाको विर्तामोडस्थित इकम कलेजमा राष्ट्रनिर्माता पृथ्वीनारायण शाहको सालिक अनावरण गरिएको छ ।
कलेजमा निर्मित पृथ्वीनारायण शाहको सालिक पूर्वराजा ज्ञानेन्द्र शाहले अनावरण गरेका हुन् । सालिक अनावरणका लागि शुक्रबार नै झापा आएका पूर्णराजा शाहलाई होटल मेची क्राउन प्लाजामा बस्ने व्यवस्था मिलाइएको थियो । शनिवार मध्यान्नको समयमा हजारौंको संख्यामा रहेका मोटरसाइकल साथै सुरक्षाकर्मीबाट स्कर्टिङ गरेर पूर्व राजा शाहलाई कार्यक्रमस्थल सम्म पुर्याइएको थियो ।
कार्यक्रममा जनसहभागिता जुटाउन राष्ट्रिय प्रजातन्त्र पार्टीका अध्यक्ष राजेन्द्र लिङ्देन करिब १० दिनदेखि झापामै रहेका थिए । राप्रपा झापाका अध्यक्ष केशवप्रसाद ओझाले कार्यक्रममा उपस्थित जनाउँन जिल्लास्थित पार्टीको सबै तहमा यस अघि नै सर्कुलर जारी गरेका थिए ।
मेची क्राउन प्लाजाबाट बिर्तामोड आइपुगुञ्जेलसम्म पनि पूर्वराजा शाहसँगै रहेका राप्रपा केन्द्रिय अध्यक्ष लिङ्देन पैदल हिँड्दा होस् वा मञ्चमा पूर्वराजा शाहसँगै रहेका थिए । आफ्नै जिल्लामा राजाको उपस्थितिमा शक्ति प्रदर्शन गर्ने अवसर जुटेको भन्दै राप्रपा अध्यक्ष लिङ्देनले स्वतःस्फुर्त रुपमा निस्किएको जनलहरलाई सामान्य रुपमा लिन नहुने बताएका छन् । कार्यक्रमलाई राप्रपाले शक्ति प्रदर्शनको रुपमा लिएको छ । राप्रपा कोसी प्रदेश अध्यक्ष राम थापाले कार्यक्रममा प्रदेशभरबाट सहभागी आएको बताएका छन् ।
मोटरसाइकल ¥यालीसहित पूर्वराजा शाहलाई मेचीनगरस्थित मेची क्राउन प्लाजाबाट बिर्तामोड–१ पञ्चकन्यामा रहेको इकम कलेजको कार्यक्रमस्थलमा आइपुग्दा राप्रपाका कार्यकर्ता तथा राजावादीहरूले राजतन्त्र पक्षधर नारा लगाएका थिए ।
पुर्व राजा शाहको स्वागतकालागि बिर्तामोडमा ठूलो संख्यामा सर्वसाधारण उपस्थित भएका थिए। मानिसको भीड छिचोल्दै पूर्वराजा शाहलाई कार्यक्रमस्थलसम्म आइपुग्न झण्डै दुई घण्टा समय लागेको थियो ।पूर्वराजा शाहले सालिक अनावरण कार्यक्रममा कुनै किसिमको सम्बोधन भने नगरेको जनाइएको छ ।
