सुरुङ्गा \ झापाको कनकाई नगरपालिकामा जारी चौथो कनकाई कपको उपाधि अर्जुनधारा नगरपालिकाले हात पारेको छ ।
कनकाई माविको खेल मैदानमा मंगलवार भएको फाइनल खेलमा बिर्तामोड नगरपालिकालाई ट्राई ब्रेकरमा हराउँदै नगद १ लाख ११ हजार १ सय ११ रुपैँया राशी सहितको उपाधि अर्जुनधाराले हात पारेको हो । प्रतियोगितामा दोस्रो हुने बिर्तामोड नगरपालिकाले नगद ५५ हजार ५ सय ५५ रुपैँयामै चित्त बुझायो ।
खेल अवधिभर गोल रहित बराबरी भएपछि भएको ट्राईब्रेकरमा समेत दुबै टिमको ४—४ को बरावरी भएपछि खेलको निर्णय सडन डेथमा गरिएको थियो । जसमा अर्जुनधारा ५—४ गोल अन्तरले बिजयी भएको हो । बिजयी तथा उपविजयी हुने दुबै टिमलाई प्रदेश सभा सदस्य हिराकुमार थापा , कनकाई नगरपालिकाका प्रमुख राजेन्द्रकुमार पोखरेल, अर्जुनधारा नगरपालिकाका प्रमुख हरिकुमार राना, कनकाई नगरपालिकाकी उपप्रमुख मन्जु प्रसाई, झापा ११ फुटबल क्लवका अध्यक्ष जलकुमार गुरुङ लगायतले नगद र ट्रफि हस्तान्तरण गरेका थिए ।
प्रतियोगिताको सर्वोत्कृष्ट खेलाडी बिर्तामोडका टिम क्याप्टेन अंकुर तामाङ घोषित भए । उनले पुरस्कार स्वरुप नगद ४ हजार प्राप्त गरेका छन् । फाइनल खेलको म्यान अफ द म्याच अर्जुनधाराका गोलकिपर संजय गुरुङ घोषित भए । उनले नगद २ हजार रुपैँया प्राप्त गरे ।
आयोजक कनकाई खेलकुद प्रतिष्ठानका अध्यक्ष दुर्गा प्रसाईँको सभापतित्व एवम् १ नं. प्रदेशका प्रदेश प्रमुख सोमनाथ अधिकारी प्यासीको प्रमुख आतिथ्य रहेको कार्यक्रमलाई सम्वोधन गर्दै प्रमुख अतिथी प्यासीले खेलकुदको माध्यमबाट देशको पहिचान मात्रै नभएर मुलुकको समृद्धिमा समेत महत्वपूर्ण भूमिका खेल्न सकिने वताएका छन् । खेलवाट युवाहरुको भविष्य उज्ज्वल हुने बताउँदै प्रमुख अतिथी प्यासीले खेलकुदले समाज र देशलाई समेत मार्गनिर्देश गरिरहेको बताएका छन् ।
खेल संयोजक राजेन्द्र उप्रेतीको स्वागत तथा सदस्य विनोद रानामगरको संचालन रहेको औपचारिक कार्यक्रममा प्रदेश सभा सदस्य हिरा थापा, प्रमुख जिल्ला अधिकारी उदयबहादुर राना, नेपाली कांग्रेस झापाका नेता देउमान थेबे लगायातले मन्तव्य राखेका थिए । कनकाई खेलकुद प्रतिष्ठानको आयोजनामा भएको प्रतियोगितामा झापाका ११ पालिकाको सहभागिता रहेको वताइएको छ ।
