झापा \ मलेसियामा बेपत्ता भएर घर फर्किएका काँकडभिट्टाका गोपाल घिमिरेको १६ वर्षपछि आमासँग भेट भएको छ । उनी मलेसियामा ६ वर्षदेखि सम्पर्कविहीन भएका थिए ।
गोपाल काठमाडौँबाट सौर्य एयरलाइन्सको जहाजमा मेचीनगर–६ स्थित काँकडभिट्टा घर आइपुगेपछि उनकी आमा सानी घिमिरेले छोरालाई देख्नासाथ अँगालो हालेर खुसीले आँसु झारिन् । छोरासँग भेट भएपछि आँसु पुछ्दै सानी घिमिरेले भनिन्–‘छोरा मलेसिया गएको १६ वर्ष भएको थियो । ६ वर्षदेखि सम्पर्कविहीन छोरालाई खोजी गरिदिने र घरसम्म सकुशल ल्याइदिने तपाईँहरू सबैलाई धेरै धेरै धन्यवाद छ ।’
शुक्रबार मलेसियाबाट काठमाडौँ आइपुगेका घिमिरेलाई नेपाली काँग्रेसका महामन्त्री एवम् झापा क्षेत्र नम्बर १ का सांसद विश्वप्रकाश शर्मा र नेपाली जनसम्पर्क समिति मलेसियाका अध्यक्ष चोलाकान्त पंगेनीेले भेटेका थिए ।
सांसद शर्माले गोपाल काठमाडौँबाट सौर्य एयरलाइन्सको जहाजमा झापा आउँदा निःशुल्क टिकटमा आएको बताए । सौर्य एयरलाइन्सका अध्यक्ष दीपक पोखरेलले गोपालको टिकट निःशुल्क गरिदिएको उनले बताए ।गोपाल मलेसियामा ६ वर्षदेखि बेपत्ता भएपछि उनकी आमाले विभिन्न व्यक्ति, संघ–संस्था र सञ्चारमाध्यमलाई गुहारेकी थिइन् ।
