कनकाई खबर \ झापाको विर्तामोड—२स्थित चारपानेमा प्रधान कार्यालय रहेको सहारा नेपाल बचत तथा ऋण सहकारी संस्थाले एक लाख एक हजार नगद राशीको ‘राष्ट्रिय व्यक्तित्व पुरस्कार’ सहकारी विज्ञ कैलाशभक्त प्रधानाङ्गलाई प्रदान गरेको छ ।
विर्तामोडमा सम्पन्न सहाराको २७ औँ वार्षिक साधारणसभा अन्तरगत अन्तिम माइन्युट प्रमाणीकरण भेलाको अवसर पारेर संस्थाले नेपाल बचत तथा ऋण सहकारी संस्थाका पूर्व अध्यक्ष समेत रहेका भक्तपुर निवासी प्रधानाङ्गलाई सो राशीको पुरस्कार प्रदान गरेको हो । यस किसमिको पुरस्कार हरेक दुई वर्षमा सहाराले प्रदान गर्दै आएको छ । यसअघि लघुवित्त विज्ञ शंकरमान श्रेष्ठ र सहकारी अभियन्ता केशव बडाल पुरस्कृत भइसकेका छन् ।
यसैगरी ‘सहारा पत्रकारिता पुरस्कार’ बाट एभिन्युज टेलिभिजनका झापा सम्वाददाता सन्तोष न्यौपाने पुरस्कृत भएका छन् । उनले २५ हजार राशीको पुरस्कार प्राप्त गरेका छन् । सम्मानित दुवैजनालाई कार्यक्रमका प्रमुख अतिथी संघिय संसदका सभामुख देवराज घिमिरेले नगद राशिसहितको पुरस्कार प्रदान गरेका हुन् ।
कार्यक्रममा सम्मानित सहकारी विज्ञ प्रधानाङ्गले—एउटाले बिरायो शाखा पिरायो भने झैं एक–दुईवटा खराब सहकारीका कारण अहिले सहकारीमा विकृति बढेको बताए । सहकारीहरुमा राजनीतिक हस्तक्षेप भयो भने पनि सहकारी अभियान सफल हुन नसक्ने उनको जोड थियो ।
कार्यक्रमको प्रमुख अतिथिका रुपमा रहेका सभामुख घिमिरेले असहायहरुका लागि वरदान सावित भएको भन्दै सहाराको प्रशंसा गरेका थिए । उनले भारतमा अमुल कम्पनीले अर्थतन्त्रमा प्रभाव पारे जस्तै नेपालमा सहारा नेपालले काम गर्दै आएको बताए ।
सहारा नेपाल साकोसका कार्यकारी प्रमुख महेन्द्रकुमार गिरीले संस्थाको आगामी योजनासहितको वार्षिक प्रतिवेदन प्रस्तुत गरेका थिए । सहारा साकोसका कार्यकारी प्रमुख गिरीले गरिव तथा विपन्न शेयर सदस्यका छोरा–छोरीहरुलाई उच्च शिक्षा अध्ययनमा सहयोग पुर्याउने उद्देश्यले संस्थाले ५ करोडको ‘सहारा शैक्षिक छात्रवृति कोष’ स्थापना गरेको बताए ।
त्यस्तै एक लाख युवाहरुलाई विभिन्न समाजिक क्लबहरु मार्फत रोजगारी सिर्जना गराइने संस्थाको भावि योजना रहेको बताइएको छ ।
युवाहरुलाई नेतृत्व, उद्यमशिलता र रोजगारीका अवसरहरु सिर्जना गर्न एक लाख युवा सदस्यहरु संलग्न गराइने कार्यकारी प्रमुख गिरीले जानकारी दिए । युथ एकेडेमी र थ्रि जिरो क्लब मार्फत युवा सदस्यहरुलाई संगठित गरिने संस्थाको योजना रहेको कार्यकारी प्रमुख गिरीले जानकारी दिए ।
सहारा नेपाल साकोसका अध्यक्ष हरिवहादुर राजबंशीको अध्यक्षतामा सम्पन्न कार्यक्रममा गौरीगञ्ज गाउँपालिकाकी अध्यक्ष फुलवती राजवंशी, नेफ्स्क्यूनका केन्द्रीय सञ्चालक सदस्य घनश्याम अधिकारी, जिल्ला सहकारी संघ झापाका अध्यक्ष गणेश ढकाल,निमित्त प्रदेश रजिष्ट्रार हरिबहादुर खत्री, नेपाल रेडक्रस सोसाइटी झापाका सभापति लोकराज ढकाल लगायतले शुभकामना मन्तव्य राख्दै सहकारीका विषयमा राज्य बेखबर रहेको आरोप लगाए । सरकारले गर्नु पर्ने समृद्धिका कार्यक्रमहरु सहकारी संस्थाहरुले हरेक गाउँ गाउँमा पुर्याएको भन्दै सहभागीहरुले सहकारी संस्थाको यो मोडललाई सफल बनाउँनु पर्नेमा जोड दिए ।
विभिन्न सांस्कृतिक प्रस्तुति सहितको कार्यक्रममा संस्थाका वरिष्ठ उपाध्यक्ष हरिप्रसाद निरौलाले शाव्दीक स्वागत गरेका थिए भने कार्यक्रमको सञ्चालन पत्रकार केशव भट्टराईले गरेका थिए ।
