कनकाई खबर \ कनकाई नगरमा आफ्नै वडामा वडा कार्यालय संचालनमा आउँने क्रम निरन्तर रुपमा जारी रहेको छ ।
यसै क्रममा कनकाई नगरका नौ वटा वडा मध्ये सवैभन्दा धेरै जनघनत्व रहेको वडा नं.३ मा एक विशेष समारोहका विच वडा कार्यालय उद्घाटन भएको छ । विगतमा साविक सुरुङ्गा गाविस हुँदै प्राथमिक स्वास्थ्य केन्द्र सुरुङ्गाले समेत सेवा दिइसकेको भवनमा वडा नं. ३ को वडा कार्यालय संचालनमा आएको हो । वडा कार्यालयको कनकाई नगरपालिकाका प्रमुख राजेन्द्रकुमार पोखरेलले उद्घाटन गरेका छन् ।
नगरको पाँचौं वडा कार्यालयका रुपमा रहेको यस कार्यालयबाट वडावासीले सहज ढङ्गले सेवा पाउँने विश्वास गरिएको छ । यस अघि वडा नं. ९, ८ , ५ र वडा नं.४ ले आफ्नै वडामा कार्यालय संचालन गरिसकेका छन् । वडाअध्यक्ष रुद्रप्रसाद चिमरीयाको सभापतित्व रहेको उद्घाटन समारोहमा स्थानीय स्तरका क्रियाशिल सामाजिक, शैक्षिक संघसंस्था साथै विभिन्न राजनीतिक दलका प्रमुख तथा प्रतिनिधीहरु, जनप्रतिनिधीसहितको बाक्लो उपस्थिती रहेको थियो । वडा कार्यालय भवनलाई अझै व्यवस्थित गर्नकालागि स्थानीय समाजसेवी दधिराम उप्रेतीको संयोजकत्वमा रहेको एक उपभोक्ता समितिले महत्वपूर्ण भूमिका खेलेको भन्दै कार्यक्रममा सहभागीहरुले प्रशंसा गरेका थिए । 
वडा सदस्य युवराज चम्लगाइँको स्वागत तथा सदस्य एवम् वडाको मेलमिलाप समितिका संयोजक छवि थपलियाले संचालन गरेको कार्यक्रममा कनकाई नगर उपप्रमुख मन्जु प्रसाइँ, वडा नं.४ का वडाअध्यक्ष गोविन्द पौडेल, ज्येष्ठ नागरीक संघ कनकाईका अध्यक्ष पुण्यप्रसाद बारकोटी, कनकाई मावि व्यवस्थापन समितिका अध्यक्ष जनार्दन उप्रेती, पूर्व जनप्रतिनिधी तिलचन्द्र उप्रेती, कनकाई उद्योग वाणिज्य संघका वरिष्ठ उपाध्यक्ष सोमनाथ उप्रेती, राप्रपा कनकाई नगर अध्यक्ष ज्योती उप्रेती, संचारकर्मी रामप्रसाद निरौला लगायतले मन्तव्य राखेका थिए ।
