झापाको बाह्रदशी-६ स्थित भित्री सडक खण्डमा भएको मोटरसाइकल दुर्घटनामा परी एक जनाको मृत्यु भएको छ । आइतबार साँझ ५:५० बजेतिर बाह्रदशी-६ सिमलचौकस्थित भित्री सडक खण्डमा दक्षिणबाट उत्तरतर्फ आउँदै गरेको मे ११ प ६२२६ नम्बरको मोटरसाइकल र विपरीत दिशाबाट जाँदै गरेको प्र १–०१–०१४प ७६४८ नम्बरको मोटरसाइकल एकापसमा जुधेका थिए ।
दुर्घटनामा मे ११ प ६२२६ नम्बरको मोटरसाइकल चालक बाह्रदशी-६ बस्ने ३८ वर्षीय कृष्ण थापाको टाउकोमा गम्भीर चोट लागेर बीएण्डसी हस्पिटल लगिएको र उपचारका क्रममा उनको मृत्यु भएको जिल्ला ट्राफिक प्रहरी कार्यालय झापाका प्रहरी निरीक्षक नवराज न्यौपानेले बताए ।
दुवै सवारीसाधन र प्र १–०१–०१४प ७६४८ नम्बरको मोटरसाइकलका चालक बाह्रदशी-५ बस्ने देवीप्रसाद प्रसाईँलाई इलाका प्रहरी कार्यालय घैलाडुब्बाले नियन्त्रणमा लिएको प्रहरी निरीक्षक न्यौपानेले जानकारी दिए । ट्राफिक प्रहरीको पहुँच नपुगेको ग्रामीण सडकमा दुर्घटना बढेको छ । चाडपर्वमा सवारी चाप बढेसँगै मादक पदार्थ सेवन गरी सवारी चलाउँदा दुर्घटना हुने गरेको प्रहरी निरीक्षक न्यौपानेको भनाइ छ ।
