बिर्तामोड । राष्ट्रिय युवा संघ झापाले अभियन्ता दुर्गा प्रसाईलाई इलामको एक कार्यक्रममा जान अवरोध गरेको छ । आज धार्मिक कार्यक्रममा सहभागी हुन इलामको दानावारी जाने प्रसाईको तयारीमा थियो ।
गत हप्ता अर्जुनधाराको नगर अधिवेशनमा युवा संघका नेताहरुको गाडि तोडफोड भएपछि उनीहरुले प्रसाईलाई देशभर अवरोध गर्ने घोषणा गरेका थिए । सोही घोषणा बमोजिम अवरोध गरिएको युवा संघका केन्द्रीय सदस्य राज आङदेम्बेले जानकारी दिनुभयो ।उहांका अनुसार गाडि तोडफोडमा संलग्न भएको आरोपमा पक्राउ गरेका प्रसाईका समर्थक भनिएका व्यक्तिलाई कानुनी कारबाही र गाडि मर्मत नगरेसम्म देशव्यापी अवरोध गरिनेछ ।
अवरोध धार्मिक कार्यक्रमको नभइ दुर्गा प्रसाईलाई गरिएको युवा संघले जनाएको छ ।युवा संघका नेता कार्यकर्ताहरुको कडा अवरोधका कारण प्रसाईँले इलाम दानाबारीको शुक्रवारेमा दुर्गा माताको मूर्ति प्रतिस्थापन गर्ने कार्यक्रम स्थगित भएको छ ।
दानाबारीमा निर्माण गरिएको दुर्गा मन्दिरमा ९ दिनसम्म पुराण लगाएर आज फूलपातीका दिन प्रसाईँले दुर्गा माताको मूर्ति प्रतिस्थापन गर्ने कार्य क्रम रहेको थियो ।
दानाबारी जाने मुख्य सडकको सुखानीमा युवा संघका कार्यकर्ताहरूले बिहानैदेखि अवरोध गरेपछि सुरक्षाका कारण कार्यक्रम नै स्थगित गरिएको छ ।
दुई साताअघि काठमाडौँमा प्रसाईँलाई मोसो दलेपछि युवा संघ र प्रसाईबीच द्वन्द्व सुरु भएको हो। नयाँ पेपरबाट
