कनकाई खबर \ झापाको कनकाई—५ स्थित न्यु रेलिमाई युवा क्लबको आयोजनामा तुलसीबारीमा सम्पन्न प्रथम प्रदेश स्तरीय नकआउट फुटवल प्रतियोगिताको उपाधी न्यु स्टार क्लव बिर्तामोडले हात पारेको छ ।
तुलसीवारी स्थित देबकोटा प्राविको खेल मैदानमा न्यु स्टार क्लव बिर्तामोड र आयोजक न्यु रेलिमाई युवा क्लव बिच शनिबार भएको प्रतिस्पर्धात्मक खेलको ट्राईबेकरमा न्यु स्टार क्लव बिर्तामोडले उपाधी हात पारेको हो । दुबै टिमबाट कुनै गोल नभएपछि ट्राईबेकरबाट प्रतियोगिताको निर्णय भएको खेल संयोजक रमेशचन्द्र दहालले जानकारी दिए \
यस अघि भएको दोस्रो सेमिफाइनल खेलबाट काजीमान फुटबल क्लव चन्द्रगडीलाई १ – ० गोल अन्तरले हराउदै न्यु स्टार क्लव बिर्तामोडले फाइनलको यात्रा तय गरेको थियो । खेलमा विजेता टिम न्यु स्टार बिर्तामोडका खेलाडी बिजय राई म्यान अफ दि म्याच घोसित भए ।
प्रतियोगिताको विजेता टिम न्यु स्टार बिर्तामोडले नगद १ लाख १ हजार १ सय एघार नगद, ट्रफी , मेडल र प्रमाण पत्र प्राप्त गर्यो । त्यस्तै दोस्रो हुने आयोजक न्यु रेलिमाईले ७५ हजार ५ सय पचपन्नमा चित्त बुझाउँदै ट्रफी , मेडल र प्रमाण पत्र प्राप्त गर्यो । कार्यक्रममा विजेता टिमलाई कनकाई नगरपालिकाका प्रमुख राजेन्द्रकुमार पोखरेलले नगद पुरस्कारसहितको मेडल प्रदान गरेका थिए ।
त्यस्तै विधागत रुपमा उत्कृष्ट खेलाडीलाई समेत पुरस्कार प्रदान गरेको आयोजक संस्थाका अध्यक्ष मोतिखर ओझाले जानकारी दिए । खेलको समापन समारोहका अवसरमा पुर्व खेलाडी, ज्येष्ठ नागरिक सहित विभिन्न व्यक्तित्वहरुलाई सम्मान गरिएको थियो ।
खेलको प्रथम नगद पुरस्कारको प्रायोजन पिता स्वर्गीय छविलाल ओझाको स्मृतिमा आयोजक संस्थाका अध्यक्ष समेत रहेका मोतिखर ओझा(मोहन) सहित ओझा परिवारबाट र दोस्रो नगद पुरस्कारको प्रायोजन पिता स्वर्गीय विष्णुप्रसाद दाहाल र माता स्वर्गीय कर्णकुमारी दहालको स्मृतिमा प्रतियोगिताको खेल संयोजक समेत रहेका रमेशचन्द्र दाहालसहित परिवारबाट प्रायोजन गरिएको वताइएको छ ।
क्लवका अध्यक्ष मोतिखर ओझाको सभापतित्व एवं संघीय सांसद एल.पी.साँवाको प्रमुख आतिथ्य रहेको कार्यक्रममा कनकाई नगरपालिकाका प्रमुख राजेन्द्रकुमार पोखरेल, कनकाई वडा नं. ५ का वडाअध्यक्ष कृष्णवहादुर राई लगायतले खेल क्षेत्रको विकासकालागी आवश्यक सहयोग गर्ने प्रतिवद्धता जनाएका थिए ।
देवकोटा प्रावि व्यवस्थापन समितिका अध्यक्ष पुण्यप्रसाद ओझाले स्वागत गरेको कार्यक्रमको संचालन विद्यालयका प्रधानाध्यापक उमानाथ तिम्सिना र शिक्षक मोतीबहादुर बुढाथोकीले गरेका थिए ।