कनकाई खबर \ झापाको कनकाई —१ स्थित प्रजापति सामुदायिक वन उपभोक्ता समूहको खेल मैदानमा आज विहिबारदेखी कनकाई नगर क्षेत्रको वडास्तरीय फुटबल खेल संचालन भएको छ ।
स्थानीय स्तरमा विभिन्न सामाजिक गतिविधिमा क्रियाशिल प्रजापति सामाजिक क्लवको आयोजनामा संचालन भएको वडास्तरीय फुटबल प्रतियोगिताको कनकाई नगरपालिकाका प्रमुख राजेन्द्रकुमार पोखरेलले उद्घाटन गरे ।
आज उद्घाटनका अवसरमा दुईवटा खेल सम्पन्न भएका थिए । पहिलो खेल कनकाईको वडा नं. ३ र वडा नं.५ विच भएकोमा वडा नं.३ ले १—० को अन्तरमा वडा नं.५ लाई पाखा लगाउँदै विजेता बनेको छ । वडा नं.३ का खेलाडी विजय मुर्मू(म्याक्स) ले गरेको एक गोलले नै टिमलाई अग्रता दिलायो । खेलको म्यानअफ द म्याच वडा नं.५ का खेलाडी मनिष सेम्बो लिम्बू घोषित भए । उनलाई मनकामना प्रिन्टस् दुर्गापुरले स्पोन्सर गरेको म्यान अफ द म्याचको पुरस्कार प्रदान गरियो ।
त्यस्तै आजै भएको कनकाईको वडा नं.२ र वडा नं.८ विचको दोस्रो खेलमा दुवै टिमबाट १ \ १ गोल गरी खेल बराबरी भएपछि टाइब्रेकरबाट अन्तिम निर्णय भएको थियो । जसमा वडा नं.२ विजयी भएको आयोजक समितिका अध्यक्ष ईश्वर सुवेदीले जानकारी दिए । खेलको म्यान अफ द म्याच वडा नं.८ का सन्दिप इदिङ्गो घोषित भए । उनलाई होटल स्वर्गलोक दमकले स्पोन्सर गरेको म्यान अफ द म्याचको पुरस्कार प्रदान गरियो ।
भोली २६ गते शुक्रबारको पहिलो खेल कनकाई वडा नं.७ र वडा नं. ४ विच हुने छ भने दोस्रो खेल कनकाईको वडा नं.१ र वडा नं.९ विच हुने आयोजक समितिले जनाएको छ ।
आज २५ गते उद्घाटन भई २९ गते समापन हुने प्रतियोगिताको प्रथम पुरस्कार नगद रु.२१ हजार १ सय ११ र दोस्रो पुरस्कारको राशी रु.१५ हजार १ सय ११ का साथमा मेडल, ट्रफी र प्रमाण पत्र रहेको आयोजक संस्थाका पुर्व अध्यक्ष दिपेश रिमालले जानकारी दिए । आयोजक संस्थाका अध्यक्ष ईश्वर सुवेदीको सभापतित्व एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको प्रतियोगितामा कनकाई वडा नं.१ का वडाअध्यक्ष शुसिलकुमार पोखरेल, प्रजापति सामुदायिक वनका अध्यक्ष मातृका पोखरेल लगायतले शुभकामना मन्तव्य राख्दै कार्यक्रमको सफलताको कामना गरे ।औपचारिक कार्यक्रमको संचालन संस्थाका पुर्व अध्यक्ष दिपेश रिमालले गरेका थिए ।