कनकाई खबर \ झापाको सुरुङ्गामा रहेका अपाङ्ग असक्त वालवालिकालाई सिभिल बैँक लिमिटेड शाखा सुरुङ्गाले बैंक स्थापनाको ९ औँ बार्षिक उत्सवको अवसर पारेर खाद्य सामाग्री वितरण गरेको छ ।
बैँकका शाखा प्रबन्धक प्रकाश निरौला र सहायक प्रमुख रोशनबाबु सुवेदी लगायतले कनकाई ४स्थित त्रिवेणीटोलमा रहेको पुकार अपाङ्ग असक्त समाजका वालवालिकालाई समाजको आश्रममा नै पुगेर दैनिक उपभोग्य सामाग्रीका रुपमा रहेका चामल, चिउरा, नुन, चिनी , तेल, दाल, मसला वितरण गरेका हुन् । बैँकले सामाजिक उत्तरदायित्व अन्तर्गत अपाङ्ग वालवालिकालाई मासिक रुपमा ८ हजार २ सय ११ का दरले वार्षिक रुपमा हुन आउँने ९८ हजार ५ सय ३२ रुपैंयाँ वरावरको एक बर्षको खाद्यान्न सामाग्री वितरण गरेको शाखा प्रमुख निरौलाले बताए । नेपालभरीमा एकसय भन्दा माथिको संख्यामा शाखा विस्तार गरेको यस बैंकले ७७औं शाखाका रुपमा सुरुङ्गामा पाँच महिना अघिदेखी मात्र सेवा विस्तार गरेको वताइएको छ । 
पुकार अपाङ्ग असक्त समाजकी अध्यक्ष निर्मला ओझाको सभापतित्वमा सम्पन्न सामाग्री वितरण कार्यक्रममा नेपाल रेडक्रस सोसाइटी सुरुङ्गा उपशाखाका सभापति प्रविन तिम्सिना, समाजका सहसचिव रवि भट्टराई, कोषाध्यक्ष कमल बस्नेत, स्थानीय समाजसेवी तारा कोइराला, शिवहरी मैनाली लगायतले आश्रममा रहेका २१ जना असक्त वालवालिकाकोलागि बैंकले ठुलो सहयोग गरेको बताए । बैंकिङ् कारोवारका साथै सामाजिक क्षेत्रमा समेत यस किसिमका गतिविधि संचालन गर्दै अघि बढ्ने बैंकका शाखा प्रबन्धक निरौलाले जानकारी दिएका छन् ।
पुकार अपाङ्ग असक्त समाजलाई हालैमात्र कनकाई नगरपालिकाका प्रमुख राजेन्द्रकुमार पोखरेलले एक कठ्ठा जमिन दिएपछि एनएमबी बैँकले २५ लाखको लागतमा आवास समेत बनाइदिएको छ । नवनिर्मित आवास परिसरमा समाजले भर्खरै महापुराणको आयोजना गरी सफलतापूर्वक सम्पन्न गरिसकेको वताइएको छ ।
