कनकाई खबर \ संघीय निजामती विधेयकमा असन्तुष्टि जनाउँदै स्थानीय तहका कर्मचारीले सुरु गरेको आन्दोलन आज पनि जारी छ ।
आन्दोलनरत स्थानीय तह कनकाई नगरपालिकाका कर्मचारीहरुले समेत अत्यावश्यक सेवा बाहेकका अन्य सबै सेवा बन्द गर्दै आन्दोलनलाई जारी राखेको स्थानीय तह कर्मचारी संघर्ष समिति कनकाई नगरपालिकाकी संयोजक जमुना कटुवालले जानकारी दिएकी छन् । संयोजक कटुवालको नेतृत्वमा कनकाई नगरपालिकाका सबै नौ वटै वडाका कर्मचारीहरु नगरपालिका परिसरमा भेला भएर विरोध सभा तथा पेनडाउन कार्यक्रम गर्दै आएको बताइएको छ ।
असोज १५ देखि सडक आन्दोलन थालेका कर्मचारीहरूमाथि काठमाण्डौमा प्रहरीले हस्तक्षेप गरेको थियो । बानेश्वरमा निषेधित घेरा तोड्न खोज्दा प्रहरीको लाठी चार्जबाट केही प्रदर्शनकारी घाइते समेत भएका थिए । घाइते हुनेमा कनकाई नगरपालिकाका कर्मचारी देवी खनाल समेत परेका थिए । आन्दोलनमा कनकाई नगरपालिका स्थानीय तह कर्मचारीको तर्फबाट भाग लिन काठमाण्डौ गएका खनाल र कर्मचारी लक्ष्मीप्रसाद अधिकारी मध्ये खनाल घाइते भएको संघर्ष समिति कनकाईका सचिव खगेन्द्र मिश्रले जानकारी दिए ।
आन्दोलनरत संघर्ष समिति कनकाईका तर्फबाट कोषाध्यक्ष समेत रहेका लक्ष्मीप्रसाद अधिकारीले काठमाण्डौमा भएको आन्दोलनको अवस्था साथै विविध विषयको जानकारी गराएका थिए । वार्ताबाट समस्याको निकास आउँन सकेमा नियमित काममा लाग्ने बताउँदै कर्मचारी अधिकारीले सेवाग्राहीलाई समेत प्रभाव पर्ने गरी भएको आन्दोलन रहर नभइ बाध्यता भएको बताए ।
संघीय निजामती सेवा ऐनको सट्टा एकीकृत निजामती सेवा ऐन जारी गर्नुपर्ने, प्रमुख प्रशासकीय अधिकृत स्थानीय तहकै कर्मचारी हुनुपर्ने, अन्तरस्थानीय तहका कर्मचारीको सरुवामा दोहोरो सहमति आवश्यक नपर्ने लगायतका माग राखी स्थानीय तहका कर्मचारी आन्दोलित छन् ।
संघीय निजामती ऐनमा स्थानीय तहका कर्मचारीलाई विभेद गरिएको उनीहरूको गुनासो छ । स्थानीय तहका कर्मचारीलाई निजामतीको परिभाषाभित्र समेटिनुपर्ने, संघ, प्रदेश र स्थानीय तहका कर्मचारीहरूलाई कुनै पनि सेवामा प्रवेश गर्दा उमेर हद नलगाउनुपर्ने, अन्तर प्रदेश सरुवाको व्यवस्था ऐनमै राखिनुपर्ने लगायतका माग छन् ।
कर्मचारीहरूले संघीय निजामती सेवा ऐनको सट्टा एकीकृत निजामती सेवा ऐन जारी गर्, अन्तर प्रदेश सरुवा लागू गर्, सेवा करारका कर्मचारीको उचित व्यवस्थापन गर लगायतका प्लेकार्ड बोकेर विरोध जनाएका थिए ।
