झापाको कनकाई नगरमा प्रधान कार्यालय स्थापना गरी साप्ताहिक रूपमा प्रकाशन हुँदै आएको कनकाई खबर साप्ताहिक पत्रिकाले आफ्नो प्रकाशनको पाचौं वर्ष सफलतापूर्वक पुरा गरेको छ ।
यो पत्रिका छैटौं वर्षमा प्रवेश गरेको सुअवसरमा गौरवको अनुभूति गर्दै हार्दिक शुभकामना व्यक्त गर्दछु । स्थापनाको छोटो अवधिमा यो पत्रिका प्रेस काउन्सिल नेपालको मूल्याङ्कनका आधारमा स्थानीय (क) वर्गमा पर्न सफल भएको कुरा हाम्रा निम्ति खुसीको कुरा हो । यसको आधारमा यो पत्रिकाको भविष्य सुन्दर हुनेमा पूर्ण विश्वास गर्न सकिन्छ ।
झापा जिल्लाका अन्य पालिकामा समेत प्रत्यक्ष वितरण हुँदै आएको कनकाई खबर साप्ताहिकले प्रविधिको विकाससँगै कनकाई खबर डटकम अनलाइन समेत सुरुबाटै सञ्चालनमा ल्याएको छ । अनलाइन न्यूज पोर्टलमार्फत विश्वभरका पाठकमाझ आफ्नो पहुँच कायम गर्न सफल भएको यस सञ्चार माध्यमलाई देशविदेश सबै ठाउँका पाठक र शुभेच्छुकहरूले भरोसायुक्त सञ्चार माध्यमको रूपमा हेरिरहेका छन् ।
वर्तमान समयमा पत्रकारहरू कुनै न कुनै पार्टीका सदस्य हुने वा उनीहरूप्रति सहानुभूति राख्ने खालका छन् । विशेष गरी यो प्रवृत्ति पत्रिकाहरूको हकमा बढी देखिने गर्दछ । हामीले कुनै पनि पत्रिकाहरूलाई हे¥यौं भने त्यो पत्रिका कुन पार्टीको भनेर थाहा पाउन सक्छौं । किनभने त्यस्ता पत्रिकाहरूले कुनै दलविशेषको पृष्ठपोषण गरेका छन् । दुर्भाग्य नै हो पत्रकारहरू आस्थाका आधारमा विभाजित भएको पाइन्छ ।
यतिसम्म कि तिनीहरू आपूmलाई व्यावसायिक भन्न पनि रुचाउँदैनन् । उनीहरू राजनीतिक पार्टीका युनियन जस्ता देखिन्छन् । कुनै पनि दल विशेषको पक्षमा वकालत नगर्ने र स्वतन्त्र, साझा सञ्चार माध्यमको रूपमा व्यावसायिक पत्रकारिताको उद्देश्यका साथ कनकाई खबरको प्रकाशन शुरु भएको थियो । समाजको बेथिति, विकृति र विसङ्गतिका विरुद्धमा र जनताको पक्षमा कलम चलाउने सङ्कल्पकासाथ स्थापित यो पत्रिका छैटौं वर्षमा प्रवेश गरेको छ ।
पत्रिकाको प्रगतिको पहिलो आधार पाठकको विश्वास र माया हो । विश्वास पाउन विश्वसनीय काम गर्न सक्नुपर्छ भने मायाका लागि जनताको सुखदुःखको साथी बन्न सक्नुपर्छ । यो पत्रिका पाठकको माया र विश्वासको जगमा अडेको छ । जनताको हितका खातिर बनाइएका नीतिनियम त्रुटिपूर्ण हुँदा वा नियमको पालना नहुँदा जनतालाई सजग र सचेत गराउनु पत्रकारिता क्षेत्रको धर्म हो । धर्म भनेको आफ्नो कर्तव्य पूरा गर्नु हो । आज यो पत्रिका लोकतन्त्र, मानवअधिकार र प्रेस स्वतन्त्रताको पक्षमा अविचलित रूपमा क्रियाशील छ ।
कनकाई खबर जनतालाई सुसूचित गर्ने, जनचेतनाको अभिवृद्धि गराउने र जनताको अधिकार प्राप्तिका निम्ति भएका सङ्घर्षलाई सघाउ पु¥याउने दायित्वबाट कहिल्यै विमुख भएको छैन । यो पत्रिका शिक्षित र चेतनशील पाठकहरूको निगरानीमा सदैव जनताको हितका लागि प्रयत्नशील रहँदै गर्दा आफूभित्रका कमीकमजोरीलाई चिनेर आत्मालोचित हुँदै अघि बढिरहेको छ । नैतिक आदर्शबाट अभिप्रेरित उत्साही समूहबाट चलेको यो अखवार मोफसलमा रहेर पनि जनताको आशा र भरोसा बनेको छ भने जनताको आशा र विश्वासमै टिकेको पनि छ ।
आजको जुग प्रतिष्पर्धाको जुग हो । पत्रिका पनि प्रतिष्पर्धाबाटै अघि बढ्ने हो । सञ्चारकर्मीले सदैव बुझ्नुपर्ने कुरा भनेको जनताजनार्दनभन्दा शक्तिशाली अरु कोही छैन, तसर्थ आम पाठकको लागि भरोसायुक्त पत्रिकाको रूपमा आफ्नो पत्रिकालाई विकसित गर्नुपर्छ । आजसम्मको उपलब्धिको जगमा पाठकको त्यो भरोसा, आशा र विश्वासलाई अझै माथिल्लो उचाइमा लैजान जरुरी छ । पाठकको प्रेरणा र स्नेहले भविष्यमा अझ तथ्यगत र समाजोपयोगी सामग्री प्रस्तुत गर्न अझ बढी जाँगर र बल प्रदान हुनेछ । पत्रकारहरूबाट पनि व्यावसायिक मर्यादा विरुद्ध आचरण भएका अनेकौं दृष्टान्तहरू छन् ।
पत्रपत्रिकामा आफूलाई रिस उठेको संस्था वा पदाधिकारी विरुद्धमा नभएका कुरालाई समाचार बनाएर प्रकाशित गर्दा त्यसबाट निर्दोष व्यक्ति वा संस्थाहरूले ठूलो कठिनाइ व्यहोर्नुपर्ने हुन्छ । समाजका असल परम्पराका विरुद्ध धर्मका नाममा, राजनीतिका नाममा वा अन्य कुनै नाममा आक्रमण हुन्छ भने वा अग्रगमनका विरुद्धमा जनविरोधी, लोकतन्त्रविरोधी र राष्ट्रविरोधी कुनै गतिविधि भएमा सञ्चार जगत् चुपचाप लागेर बस्न मिल्दैन । यस्तो अवस्थामा पत्रकारजगत्ले न्याय, धर्म र राष्ट्रियताको पक्ष लिन्छ । जाति, धर्म, भाषा र राष्ट्रियताभन्दा पनि माथि मानवता हुन्छ र प्रेस जगत् अन्ततः मानवताको पक्षमा उभिन्छ ।
सञ्चार क्षेत्रका अनगिन्ती चुनौतीहरू छन् । धेरैजसो पत्रपत्रिकाहरू पार्टी वा पार्टीभित्रका गुट विशेषसँग धेरथोर, प्रत्यक्ष वा परोक्ष रूपमा आबद्ध हुने गरेका छन् । तर पत्रपत्रिकाले सूचनाप्रवाहमा निष्पक्षता देखाउनुपर्छ भन्ने मूल मान्यतालाई आत्मसात गर्दै अघि बढेको यो पत्रिका सत्य, विश्वसनीय, सन्तुलित, स्वतन्त्र रहने र आफ्नो जिम्मेवारी र अरुको सम्मानको सुरक्षा गर्नुपर्छ भन्ने मान्यताबाट अनुप्राणित छ आजसम्म र यो क्रम जारी रहनेमा विश्वास गर्न सकिन्छ ।
कनकाई खबर व्यावसायिकताको पक्षमा उभिँदै आएको छ । संवाददाता र सम्पादकमा व्यावसायिक निष्पक्षता भएमा गुणस्तरमा वृद्धि हुन्छ । पत्रपत्रिकाहरूले आफ्ना विचार समाचारबाट अभिव्यक्त गर्नुभन्दा सम्पादकीय, स्तम्भ वा लेखमार्फत दिने हो भने व्यावसायिकतामा बल पुग्छ । आचारसंहिता नैतिक बन्धन हो, यो कानुन होइन, तर पत्रकारका लागि यो नै ठूलो बन्धन हो ।
शुभचिन्तक र चेतनशील पाठकवर्गबाट प्राप्त सल्लाहसुझाव, हौसला, आलोचना, सहयोगको आधारमा उभिएर यसले विगतका कमीकमजोरीको समीक्षा गर्दै आगतका कदमहरु चाल्ने हो । आशा छ–कनकाई खबरले आफ्नो गरिमालाई अझ उन्नत स्तरमा विकास गरेर लैजाने छ । यो सदैव सत्य र न्यायको पक्षमा सतीसालझैं उभिनेछ । व्यावसायिकताको कसीमा अब्बल बनेर स्पातिलो बन्नेछ यो पत्रिका । छैटौं वर्षको यो शुभारम्भमा मुरीमुरी बधाई एवम् सफलताको हार्दिक शुभेच्छा !!