कनकाई खबर साप्ताहिक पाँचौं वर्ष पूरा गरेर छैटौं वर्षमा प्रवेश गरेको छ । छैटौं वार्षिकोत्सवको शुभअवसरमा सम्पूर्ण पाठक, लेखक, विज्ञापनदाता, सहयोगी एवम् शुभेच्छुक सबैमा हार्दिक धन्यवाद व्यक्त गर्दछौँ । साथै, यस सञ्चार माध्यमका निर्देशक ज्यु, प्रमुख सल्लाहकार ज्यु, सल्लाहकार सम्पादक ज्यु, संचार माध्यममा आवद्ध पत्रकार साथीहरू, अन्य सबै–सबै संचारकर्मी अग्रज एवं सहयात्री साथीहरुप्रति विशेष आभार व्यक्त गर्दछौँ । उहाँहरूको परिश्रम, लगाव र मायाकै कारण संस्थाले यहाँसम्मको यात्रा तय गर्न सफल भएको हो ।
डिजिटल मिडियाको यो प्रतिस्पर्धी बजारमा डिजिटलसँगै प्रिन्ट मिडिया जन्माएर आफ्नो पहिचान स्थापित गर्नु सजिलो कामहोइन । प्रिय पाठकले देखाएको विश्वासका कारण हामीले यो पाँच वर्षको अवधिमा एउटा पहिचान स्थापित गर्न सफल भएको ठानेका छौं । विभिन्न सञ्चार माध्यहरुको यो भीडमा अलग पहिचान बनाइराख्न अनवरत खटिरहनु भएका पत्रकार साथीहरू प्रति आभार व्यक्त गर्दै आगामी दिनमा पनि यस्तै सक्रियताको अपेक्षा राख्दछौँ । प्रिय पाठकको माया, सद्भाव र समालोचनात्मक प्रतिक्रियाले हामीलाई सधैँ उत्साहित बनाइराख्ने ऊर्जा प्रदान गरिरहन्छ ।
वि.सं.१९५८ देखि इतिहास बोकेको छापा अर्थात् प्रिन्ट मिडिया आजसम्म पनि उत्तिकै लोकप्रिय छ । मडियाको विकास हुने क्रमसँगै अन्य नयाँ मिडियाहरू रेडियो, टेलिभिजन, एफएम, अनलाइन मिडिया तथा सामाजिक सञ्जालहरू प्रचलनमा आएतापनि आम जनमानसमा छापा मिडियाप्रति अगाध स्नेह र झुकाव अझै ताजगी नै छ ।
बिहानको तातो चियाको चुस्कीसँगै पत्रिका पढ्नु अलग्गै आनन्दको आभास हुन्छ, तथापि हरेक नेपालीको हातहातमा मोबाइल उपलब्ध छन्, जसमा इन्टरनेटको माध्यमबाट संसारभरको समाचार हेर्न पाइन्छ । मानिसको जीवनशैली परिवर्तनसँगै मिडियाको प्रयोग पनि फेरिन्छ । तर, नेपालीमा अमीट छाप स्थापित गर्न सफल छापा सञ्चार माध्यम सञ्चारको दुनियाँमा अझै बढी लोकप्रिय बन्दै गएको हाम्रो बुझाई छ ।
वि.सं.२०४९ पछि निजी क्षेत्रमा छापा सञ्चार माध्यमको प्रवेशसँगै छापा सञ्चार माध्यमको आयाम बढेर पाठकको संख्यामा अत्यधिक वृद्धि भएको थियो, यो क्रम बढ्दो छ । तर, पछिल्ला दिनहरूमा आएर मूलत वि.सं २०६३ पछि अनलाइन तथा सामाजिक सञ्जालको आगमनसँगै युवाहरूको झुकाव नयाँ मिडियातर्फ ढल्केको यथार्थ छ । तर, छापा माध्यमहरूको आवश्यकता सरकारी नियम–कानुन, प्रेस विज्ञप्ति, राष्ट्रिय भाषामा प्रकाशन हुने आदि कारणले पनि आम जनमानस,व्यावसायिक, उद्योग–प्रतिष्ठानका लागि अपरिहार्य छ ।
छापा सञ्चार माध्यमको महत्व र यसको आवश्यक्तालाई मध्यनजर गर्दै आम पाठकको रचनात्मक अनि सकारात्मक सुझावका आधारमा थप परिस्कृत हुँदै हामी छैटौं वर्षमा प्रवेश गरेका छौँ । पाठकको मायाले हामीमाथि नागरिकलाई अझ सुसूचित बनाउने दायित्व थपिएको महसुस भएको छ । त्यसैले हामी अझै विशिष्टीकृत हुँदै जाने प्रयासमा छौँ । मिडियाको प्रयासले नै आम नागरिकको जीवनस्तर, सोचाइ र समृद्धिमा योगदान पुग्नेमा हामी विश्वस्त छौँ । सञ्चार माध्यमले समेट्नु पर्ने दायरा फराकिलो बन्दै गएको छ र यसप्रति पाठकका आशा, अपेक्षा र आकांक्षा पनि बढ्दै गएका छन् ।
सञ्चार माध्यमको विकास र बृद्धिसँगै पत्रकारको संख्या बढ्दै जाँदा ती पत्रकारको क्षमता विकास, पेशाप्रति जवाफदेही र जिम्मेवार बनाउनु पर्ने दायित्व स्वयम् आफुसँग मात्र छ । यहाँ समाचार लेखेको आधारमा नभएर फेसबुकको स्टाटसमा लाइक कमेन्टको आधारमा पत्रकारको श्रेणी मापन गरिन्छ । यसबाट आउने दिनहरूमा स्वतन्त्र रूपले मर्यादित पत्रकारिता गर्ने, समाजप्रति जिम्मेवारी भई, आफ्नो कामप्रति उत्तरदायित्व बहन गर्ने पत्रकारिता इतिहास त बन्ने होइन भन्ने आशंका पनि महसुस हुनथालेको छ ।
हरेक चुनौतीको सामना गर्दै आम पाठकहरुलाई समाचारका माध्यमबाट हरेक विषयवस्तु प्रस्तुत गर्नु र सुसूचित गर्नु हाम्रो कर्तव्य हो । अनेकौं चुनौतीको सामना गर्दै आज हामी छैटौं वर्षमा प्रवेश गरेको छौं । साप्ताहिकको रुपमा मात्र सञ्चालन भएको कनकाई खबर छैटौं बर्षमा आइपुग्दा सञ्चार गृह सफल बनेको हाम्रो बुझाई छ ।
हामीले साप्ताहिकको रुपमा कनकाई खबर साप्ताहिक, डिजिटल रुपमा कनकाई खबर डटकम अनलाइन साथै बार्षिक रुपमा कनकाई खबर म्यागेजिन सहित वार्षिक क्यालेण्डर प्रकाशन गरिरहेका छौं । कनकाई खबरलाई थप व्यवस्थित बनाएर सञ्चालन गर्ने अभियानमा निरन्तर सक्रिय भएर लाग्ने छौं । पत्रिकालाई थप व्यवस्थित गर्दै पठनीय बनाउन हामी प्रतिबद्ध छौं । साथै, आगामी दिनमा यहाँहरुको थप सल्लाह र सुझावको अपेक्षा गर्दछौं ।
प्रकाशक \ सम्पादक ः रामप्रसाद निरौला