चितवन\बिगत १४ वर्षदेखि इजरायलको तेलअभिभमा रहेकी चितवनकी सुमित्रा दवाडीले बिगतको इजरायल प्यालेस्टाइन युद्ध भन्दा यसपटकको लडाइ खतरनायक रहेको बताएकी छन्
शहरको भित्री भागसम्म हमासका लडाकुहरु छिरेकोले घरबाट बाहिर निस्कन नै खतरा भएको उनले नारायणी अनलाइनलाई बताएकी हुन् । उनले भनिन्, ‘ पहिले आकाशमा रकेटको लडाइ हुन्थ्यो तर अहिले शहरको गल्लीगल्लीमा हमासका लडाकुहरु घुसेकोले घरको ढोका खोल्न नै डर छ । सरकारले ढोका नखोल्नु र बाहिर ननिस्कनु भनेको छ । साइरन बज्ना साथ घरको बङ्करभित्र छिर्ने हो । घरमा रहेको खाद्यान्न खाएर बस्ने हो ।’ उनले आर्मीको ड्रेसमा हमासको लडाकु शहरभित्र छिरेको भन्ने सूचना प्रवाह भइरहेको बताइन् । उनी भन्छिन्, हामी आफ्नो सुरक्षाको लागि मोबाइलमा सोही सम्बन्धी एप डाउनलोड गरेका छौं । बङकरमा बसेर एप प्रयोग गर्छौं । एपबाट आज कता आक्रमण हुन्छ , कसरी सुरक्षित रहने भन्ने सूचनाहरु प्राप्त भइरहन्छ । ’ घरमा केयरगिभरको काम गर्ने सुमित्राले इजरायली नागरिकले हमासका लडाकुहरु प्रवेश गर्न दिनु नै इजरायली सरकारको गल्ती भएको बताउँदै आएको नारायणी अनलाइनलाई बताइन् ।
भरतपुर–१४ दिव्यनगरकी सुमित्राले घरभित्र काम गर्ने केयरगिभर भन्दा पनि बाहिर खेतबारीमा काम गर्ने नेपाली विद्यार्थीहरु समस्यामा रहेको बताइन् । हाताहातीको अवस्था के कसो छ भनेर इजरायलका सुरक्षा निकायहरुले जानकारी लिनसमेत नसकेको उनले बताइन् । –नारायणी अनलाइनबाट
