कनकाई खबर डेक्स \ सुरुङ्गा जेसीजले तालिम सप्ताहका रुपमा शनिवारदेखी जेसीज सप्ताहलाई विधिवत रुपमा उद्घाटन गरेको छ ।
‘लिडरसिप एण्ड स्टेट अफ माइन्ड’ विषयमा संचालन भएको सातदिवसीय तालिममा नेपाल जेसीजका प्रमुख प्रशिक्षक राजावावु शाहले सहजीकरण गरेका छन् । सुरुङ्गा जेसीजका अध्यक्ष कमल कट्टेलको सभापतित्व एवम् कनकाई नगर वडा नं.१ का वडाअध्यक्ष रोशनराज पोखरेलको प्रमुख आतिथ्यता रहेको तालिमवाट सहभागीहरुले ज्ञान,सिप र व्यवहार परिवर्तन गर्नकालागि सजिलो उपाय प्राप्त गर्न सक्ने नेपाल जेसीजका तालिम संयोजक एकराज गिरीले वताएका छन् । व्यवहारिक जीवनलाई सकारात्मक एवम् रचनात्मक बनाउँन तालिम फलदायी बनेको सहभागीहरुले वताएका छन् ।
कनकाई नगरका ५ वटा वडामा क्रमिक रुपले संचालन हुने तालिम सप्ताहको पहिलो दिन वडा नं.१ को विशेष सहयोगमा सुरुङ्गा जेसीजको सभा हलमा सम्पन्न तालिममा एकसय बढी प्रशिक्षार्थीहरुको सहभागीता रहेको सुरुङ्गा जेसीजका तालिम संयोजक राजकुमार कट्टेलले वताएका छन् ।
यसैगरीे आइतवार कनकाईको वडा नं.४ मा विहान ८ वजेदेखि र क्रमिक रुपले वडा नं. २, ५ र ३ मा तालिम संचालन हुने वताइएको छ । तालिम सप्ताहको चारदिन सम्म नेपाल जेसीजका प्रमुख प्रशिक्षक शाहले र अरु ३ दिन अन्तर्राष्ट्रिय उत्प्रेरक बक्ता सनद भट्टले प्रशिक्षण दिने सुरुङ्गा जेसीजका अध्यक्ष कमल कट्टेलले वताएका छन् ।
जेसीज सप्ताह संयोजक अर्जुन वोहोराले स्वागत तथा तालिम संयोजक राजकुमार कट्टेलले औचित्यमाथि प्रकाश पारेको कार्यक्रममा सुरुङ्गा जेसीजकी उपाध्यक्ष चन्दा सिटौलाले आस्थावाचन गरेकी थिइन् । सुरुङ्गा जेसीजका महासचिव प्रविन तिम्सिनाले संचालन गरेको कार्यक्रममा सुरुङ्गा जेसीजका पूर्व अध्यक्षद्वय शिव कडेल र जविन तिम्सिनाले तालिम सफलताको शुभकामना दिएका थिए भने सहभागीका तर्फवाट दिपेश रिमाल र आरजु कोइरालाले तालिम उपलव्धीमुलक भएको भन्दै खुशी व्यक्त गरेका थिए ।
