कनकाई खबर \ झापाको कनकाई—३ स्थित सुरुङ्गा बजारमा नयाँ व्यवस्थापनका साथ छुट्टै कृषिबजार संचालनमा आउने भएको छ ।
बजार क्षेत्रमा अव्यवस्थित रुपमा रहेका सब्जी व्यवसाय, फलफुल, खुद्रा रेडिमेट कपडा,कसमेटिक, जुत्ताचप्पल, चियानास्ताका घुम्ती पसल लगायतका व्यवसायीहरुकालागी छुट्टै सुरुङ्गा कृषिबजार संचालनमा आउँन लागेको हो । कनकाई नगरपालिकाले बाह्रदशी गाउँपालिका क्षेत्रमा भएको आफ्नो जमिन कनकाई सामुदायिक वनसँग सट्टा–पट्टा गरी सुरुङ्गाको पश्चिम बस स्टेण्ड उत्तर तर्फको करिव तीन बिगाहा वन क्षेत्रको जमिनमा सरसफाई गरी आवश्यक्ताअनुसार स्टल निर्माण गरेर सुरुङ्गा कृषि बजारलाई व्यवस्थित गर्न खोजीएको हो ।
हाल सुरुङ्गामा मुख्य सब्जी बजार रहेको क्षेत्रमा कनकाई नगरपालिकाले तीन तले बहुउद्येश्यीय व्यवसायीक भवन निर्माण गर्ने भएकाले सोही क्षेत्रका व्यवसायीहरुलाई आफ्नो व्यवसाय संचालनकालागी व्यवस्थित स्टल निर्माण गरी स्थानान्तरण गर्न लागिएको कनकाई—३का वडाअध्यक्ष युवराज चम्लागाईले जानकारी दिए ।
स्थानीय सरकारले निर्माण गरेको बजार संचालन कार्यविधिको मापदण्ड अनुसार व्यवसायीहरुलाई आफ्नो व्यवसाय संचालन गर्न अनुमति प्रदान गरिने वडाअध्यक्ष चम्लागाईले बताए ।पुर्व पश्चिम राजमार्गसँग जोडिएको सुरुङ्गा कृषिबजार आज बुधबारदेखी संचालनमा आउँने बताइएको छ । अत्यन्तै साँगुरो ठाउँमा बस्दै आएका व्यवसायीहरुलाई कनकाई नगरपालिकाले गरेको यो नयाँ व्यवस्थापन प्रदेशमै उत्कृष्ट भएको वडाअध्यक्ष चम्लागाईँ बताउँछन् ।
स्थायी रुपमा व्यवसाय संचालन गर्ने व्यवसायीहरुले राजस्व कार्यालय साथै स्थानीय सरकारमा दर्ता भई नियमअनुसार वार्षिक रुपमा नविकरण गरी राजस्व बुझाउँदै आएको हुनु पर्ने बताइएको छ ।
सुरुङ्गा बजार व्यवस्थापन समितिले सम्बन्धित वडा कार्यालयको समन्वयमा हाल ११८ वटा स्टल निर्माण गरिसकेको बताइएको छ । हाल २ सय बढी व्यवसायीहरुले आफ्नो व्यवसाय दर्ता गरिसकेको साथै नियमअनुसार अझै पनि व्यवसाय दर्ता गर्ने क्रम जारी रहेकोले आवश्यक्ता अनुसार स्टल निर्माण गर्दै जाने सुरुङ्गा बजार व्यवस्थापन समितिका अध्यक्ष मनोहरी बिमलीले जानकारी दिए । हाटबजारका दिन बजार क्षेत्रमा साथै कनकाई बहुमुखी क्याम्पस अगाडी लाग्दै आएको गुन्द्री बजारलाई समेत नयाँ कृषि बजारमा व्यवस्थित गरिने अध्यक्ष बिमलीले बताए।
सुरुङ्गा कृषि बजार निर्माणकालागी स्थानीय समाजसेवी डिल्लीराम उप्रेतीको अध्यक्षतामा गठन भएको नौ सदस्यीय निर्माण उपभोक्ता समिति समेत सक्रिय रहेको बताइएको छ । निर्माण उपभोक्ता समितिको सचिवमा श्रीप्रसाद खरेल, कोषाध्यक्षमा दुर्गादेवी थापा, सदस्यहरु होमप्रसाद बिमली, मनोहरी बिमली, अम्बरवहादुर कार्की, निर्मला राई, नारायण अधिकारी र वेदप्रसाद खतिवडा रहेका छन्। जसको अनुगमन समितिमा वडाअध्यक्ष युवराज चम्लागाईको संयोजकत्वमा वडाका जनप्रतिनिधिहरु रहेको बताइएको छ ।
