कनकाई \ सवै जातजातीहरुले सामूहिक पर्वका रुपमा मनाउँदै आएको छठ पर्वलाई अझै व्यवस्थित बनाउँनकालागि कनकाई छठ सेवा समाजले छठपुजाको तयारीलाई तीव्रताका साथ सम्पन्न गरेको छ ।
पवित्र कनकाई माईको पूर्वि किनारमा हरेक वर्ष झैं यस वर्षपनि विभिन्न कलाकारहरुसहितको सांगितीक कार्यक्रमका साथमा छठ पुजा सम्पन्न गर्ने योजनाका साथ तयारी पूरा गरीएको कनकाई छठ सेवा समाजका अध्यक्ष सुरेन्द्र प्रधानले वताएका छन् । ब्रतालुहरुकालागि सहज होस् भन्ने उद्येश्यका साथ नदी किनारमा घाट निर्माण गर्नकालागि आयोजकले जेसीबीको प्रयोग गरी माटो सम्याउँने काम गरेको छ । पुजालाई व्यवस्थित गर्नकालागि विभिन्न उपसमितिहरु समेत गठन गरिएको समाजका अध्यक्ष प्रधानले वताए ।
पुजा स्थलमा विभिन्न ७० वटा घाट निर्माण भएको साथै अस्थायी शौचालय सहितको व्यवस्था गरिएको वताइएको छ । विभिन्न जातजातीहरुको साँस्कृतिक झाँकीसहितको र्यालीले सुरुङ्गा बजार परिक्रमा गरी नदी किनारमा औपचारिक कार्यक्रममा सहभागी हुनेगरी योजना बनाएको वताइएको छ । प्रतिनिधी सभा सदस्य झापा क्षेत्र नं.४ का संघीय सांसद एलपी साँवा लिम्वूले छठपुजा विशेष औपचारीक कार्यक्रमको समुद्घाटन गर्ने कार्यक्रम रहेको आयोजक समितिले जनाएको छ । छठपुजाको अघिल्लो दिन शुक्रवार विहान कनकाई छठ सेवा समाजको अगुवाईमा सुरुङ्गा बजार क्षेत्र साथै कनकाई माइको पुजास्थल सम्म सरसफाईको कार्यक्रम समेत रहेको वताइएको छ ।
सामाजिक क्षेत्रमा समेत क्रियाशिल रहेको कनकाई छठ सेवा समाजले स्थानीयस्तरमा निशुल्क स्वास्थ्य शिविर, रक्तदान, होली मिलन लगायत विभिन्न गतिविधी सामुहिक रुपमा सफलतापूर्वक सम्पन्न गर्दै आएको वताइएको छ । समाजले दशैंको नवरात्रीको समयमा स्थानीय दुर्गा मन्दिरमा आउँने भक्तजनहरुलाई प्रसादका रुपमा खीर खुवाउँने कार्यक्रम समेत सम्पन्न गरेको छ । कनकाई ३ मा रहेको छठ समाजको पाँच कठ्ठा जमिनमा संस्थाको तर्फवाट सुविधा सम्पन्न सामुदायिक भवन साथै सुर्यनारायणको मन्दिर निर्माण गर्ने तयारी गरिरहेको समाजका वरिष्ठ उपाध्यक्ष एवम् कार्यक्रम संयोजक राजकिशोर चौधरीले वताएका छन् । निर्माणको योजनामा रहेको सुर्यनारायणको मन्दिर नेपालमै पहिलो मन्दिर हुने संयोजक चौधरीको ठहर छ ।
