कनकाई / कनकाई नगर वडा नं. ६ ले वडामा रहेका ६० वर्ष माथिका दशजना एकल पुरुषलाई एक कार्यक्रमका विच वृत्ति विकास अन्तर्गतको रकम वितरण गरेको छ ।
मासिक ८ सयका दरले ६० बर्ष माथिका एकल पुरुषहरुलाई वृत्ति विकाश सहयोग कार्यक्रमको रकम वितरण गरिएको कनकाई ६ का वडाअध्यक्ष लक्ष्मीप्रसाद ओलीले वताएका छन् । राज्यले सामाजिक सुरक्षाका विभिन्न कार्यक्रम ल्याएको भएपनि राज्यस्तरवाटै हाल सम्म ६० वर्ष माथिका एकल पुरुषलाई सामाजिक सुरक्षा भत्ता नदिएपछि वडास्तरवाटै कार्यक्रमको व्यवस्थापन गरिएको वडाअध्यक्ष ओली बताउँछन् । राज्यलाई समेत मार्गनिर्देशन गर्दै सामाजिक सुरक्षा कार्यक्रम अन्तर्गत कनकाई नगरको वडा नंं.६ भित्र कार्यान्वयन हुने गरी “एकल जेष्ठ पुरुष वृत्ति विकास कोष” संचालन निर्देशिका २०७५ जारी गरी नगरमै पहिलो वडास्तरीय कार्यक्रम संचालन गर्दै आएको वडाअध्यक्ष ओलीले बताए ।
कार्यक्रमकालागि वडावाट ८० हजारको वजेट स्विकृत भएको छ भने वडाअध्यक्षको तर्फवाट १० हजार थप गरी २०७५ को साउनदेखी वर्षमा दुई पटक सहयोग रकम वितरण गर्दै आएको वताइएको छ । नेपाल सरकारवाट कुनै पनि किसिमको लाभ, तलव, भत्ता, पेन्सन आदि प्राप्त व्यक्तिले यो सुविधा प्राप्त गर्न नसक्ने वडास्तरीय निर्देशिकामा जनाइएको छ । नेपाली नागरिकका रुपमा वडामा कम्तीमा एक वर्षदेखी स्थायी रुपमा बसोबास गर्दै आएको ६० वर्ष उमेर पुगेको एकल पुरुषले यो सुविधा प्राप्त गर्न सक्ने वडाअध्यक्ष ओली बताउँछन् । जेष्ठ नागरिक उपभोक्ता समिति वडा न ६ को संयोजनमा भएको कार्यक्रममा दिपावली, छठ पर्व लगायतका चाडपर्वहरुको शुभकामना आदानप्रदान समेत सम्पन्न भएको वडासदस्य ताराप्रसाद फुयालले बताएका छन् ।
